Humani Weevil: मार्चमध्येच हुमणीचे भुंगे दिसले; धोका वाढला!

Kolhapur News: प्रत्येक वर्षी वळीव पावसानंतर आढळणारे हुमणीचे भुंगेरे यंदा मार्चमध्ये पाऊस नसतानाही आढळत आहेत. लवकर भुंगे येत असल्याने यंदा हुमणीचा प्रादुर्भाव मोठ्या प्रमाणात आणि लवकरच होण्याची भीती अभ्यासकांकडून व्यक्त करण्यात येत आहे.

कोणत्याही परिस्थितीत यंदा शेतकऱ्यांना उसासह अन्य पिकांना वाचवण्यासाठी हुमणीचे व्यवस्थापन लवकर करावे लागण्याची चिन्हे आहेत. पश्चिम महाराष्ट्रासह राज्याच्या अन्य भागामध्ये यंदा हुमणीचा त्रास लवकर सुरू होईल, अशी शक्यता आहे. बदलत्या हवामानामुळे हुमणी किडीची जीवनशैलीही बदलली आहे.

पूर्वीच्या काळामध्ये वळीवाचा पाऊस झाल्यानंतर जमिनीतून भुंगेरे बाहेर येत असत. नर व मादी यांचे मीलन होऊन मातीमध्ये अंडी घातली जायची. या पार्श्‍वभूमीवर मार्चमध्येच भुंगेरे बाहेर येऊन नर- मादी मीलन व त्यातून पुढील पैदास सुरू झाली तर पुढील काळामध्ये प्रादुर्भाव खूप मोठ्या प्रमाणात वाढेल. शेतकऱ्यांनी किडीचा जीवनक्रम समजून घेऊन तातडीने उपाययोजना करणे अपेक्षित आहे.

शरद कृषी महाविद्यालयाचे माजी प्राचार्य, सध्या कृषी निविष्ठा उद्योजक असलेले कृषी कीटकशास्त्र तज्ज्ञ डॉ. शांतीकुमार पाटील यांनी हुमणीच्या बदललेल्या जीवनचक्राबाबत अभ्यास केला आहे. कोल्हापूर तसेच सांगली भागातील ऊसपट्ट्यात त्यांना मार्चमध्येच भुंगेरे आढळले आहेत.

बदलत्या हवामानामुळे हुमणीचा जीवनक्रम बदलला आहे. ‘ओव्हरलॅपिंग जनरेशन’ पद्धतीने या किडीचे जीवनचक्र सुरू आहे. सध्या करीत असलेल्या प्रयोगांमध्ये प्रति बल्ब आठ ते दहा भुंगेरे आकर्षित होत असल्याने ही चिंतेची बाब असल्याचे पाटील म्हणाले. काही वर्षांचा अभ्यास केल्यास अंडी घालण्याचा कालावधी बाराही महिने सुरू असल्याचे ते सांगतात.

येथून पुढील काळात शेतकऱ्यांना किडीचा बंदोबस्त करण्यासाठी एकात्मिक पद्धतीचा प्राधान्याने वापर करावा लागणार आहे. प्रकाश सापळे लावण्यासारखे प्रयोग लवकरात लवकर करणे आवश्यक आहे. भुंगेरे दिसणे हेच हुमणीचा पुढील मोठा प्रादुर्भाव होण्याचे संकेत असून गंध सापळे व अन्य उपाययोजनाही तातडीने करण्याचे आवाहन करण्यात येत आहे.