Satara Rain : सातारा जिल्ह्यात पावसाचा जोर ओसरला

Satara News : जिल्ह्यात पावसाचा जोर ओसरला असून, अधूनमधून सूर्यदर्शन होत आहे. कोयनेसह सर्वच प्रमुख धरणांतील पाऊस कमी झाला असलातरी कोयना, कण्हेर, तारळी धरणांतून विसर्ग कायम आहे. जिल्ह्यात गेल्या दोन दिवसांपासून पावसाचा जोर कमी झाला आहे. जिल्ह्यात २४ तासांत १९.९ मिलिमीटर पावसाची नोंद झाली आहे.

पश्चिमेकडील महाबळेश्वर, जावळी, पाटण, सातारा, कऱ्हाड, कोरेगाव, वाई या तालुक्यांत तुलनेत पाऊस जास्त असून अधूनमधून पावसाच्या दमदार सरी येत आहे. महाबळेश्वर, पाटण, सातारा या तीन तालुक्यांत ३० मिलिमीटर पावसाची नोंद झाली आहे.

दुष्काळी तालुक्यात हलका ते मध्यम पाऊस झाला आहे. कोयनेसह सर्वच प्रमुख धरणांतील पावसाचा जोर कमी झाला आहे. कोयना धरणातील कोयना ७१, नवजा ६७ व महाबळेश्वर ९३ मिलिमीटर पाऊस झाला असून धरणात प्रतिसेकंद ३८,०१४ क्युसेक आवक होत आहे.

धरणाच्या सांडव्यातून ३०,००० व पायथा वीज गृहातून २१०० असा एकूण ३२,१०० क्युसेक विसर्ग नदीपात्रात केला जात आहे. तसेच धोम-बलकवडी १४००, कण्हेर ४७६१, तारळी ५६६२ क्युसेक विसर्ग सुरू आहे. प्रमुख धरणांत ७० टक्क्यांवर पाणीसाठा झाला आहे.

जिल्ह्यातील धरणातील पाणीसाठा व कंसात टक्केवारी

कोयना – ८४.८६ (८०.६२), धोम – १०.८० (८०.००), धोम - बलकवडी – ३.४० (८३.३३), कण्हेर – ८.३८ (८२.९७), उरमोडी – ७.२२ (७२.४९), तारळी – ५.१० (८७.१८).मध्यम प्रकल्प - येरळवाडी – १.०० (८७.०४), नेर – ०.०७ (१६.८१), राणंद – ०.०३ (९.९६), आंधळी - ०.१२ (३५.३२), नागेवाडी- ०.०८ (३६.१६), मोरणा – १.४ (७५.१४), उत्तरमांड – ०.६२ (७०.५७), महू – ०.८९ (८१.२३), हातगेघर – ०.१३ (५०.०४), वांग (मराठवाडी) - २.१३ (७७.९१).