Sunflower Farming : घाटनांद्रा-धारला शेतशिवारामध्ये बहरले सूर्यफुलाचे पीक

Chh. Sambhajinagar News : घाटनांद्रासह परिसरातील धारला, चारणेर, वाडी, पेंडगाव आदी शेतशिवारांमध्ये शेतकऱ्यांनी यावर्षी सुर्यफुलाची लागवड मोठ्या प्रमाणावर केली आहे. सध्या हे पीक चांगलेच बहरात आले आहे.

सोयाबीन, भुईमूग या खाद्य तेल पिकांपाठोपाठ आता घाटनांद्रा शिवारातील शेतकरी सूर्यफुलाचे उत्पन्न घेण्याकडे वळले आहेत. बाजारात सूर्यफुलाच्या खाद्यतेलास मोठी मागणी असल्याने व शेती व्यवस्थापन आणि उत्पादन खर्च कमी, पाच ते सहा हजार रुपये प्रतिक्विंटल भाव मिळत असल्याने घाटनांद्रा धारलासह परिसरातील शेतकऱ्यांनी यंदा सूर्यफूल लागवडीकडे आपला मोर्चा वळवला आहे.

लागवडीनंतर सूर्यफुलाचे पीक अवघ्या तीन ते साडेतीन महिन्यांत तयार होते. सुधारित व संकरित जातीचे बियाणे निर्माण झाल्याने कमी वेळात व कमी खर्चात जास्त उत्पन्न मिळविता येते. त्यामुळे याकडे नगदी पैसा मिळवून देणारे पीक म्हणून शेतकरी याकडे पाहत आहेत. कपाशीचे झालेले नुकसान भरून काढण्यासाठीही एक पर्याय म्हणूनही काही शेतकरी या पिकाकडे पहात आहेत.

पिकाची लागवड व व्यवस्थापन तसेच मजुरांची गरज सुद्धा कमी भासते. पीक काढणीला सोपे असल्याने व भाव बऱ्यापैकी मिळत असल्याचे घाटनांद्रासह, धारला येथील शेतकरी सांगतात. धारला येथील तुकाराम ढोके, बालाजी मुंढे, रफिकमिया देशमुख, रखमाजी मोरे, दत्तु मोरे, प्रदिप बोरसे इतर अनेक शेतकऱ्यांनी यावर्षी सूर्यफुलाची लागवडीला पसंती दिली आहे. सध्या हे पीक चांगलेच बहरात आले असून संपूर्ण शिवार पिवळे धमक दिसू लागले आहे.