Sugarcane Seed : पूर्वहंगामी लागण करणाऱ्यांना निम्म्या किमतीत ऊस बियाणे

Sangli Sugarcane News : आडसाली क्षेत्रावर नियंत्रण करण्यासाठी पूर्वहंगामी लागण करणाऱ्या शेतकऱ्यांना निम्म्या किमतीत ऊस बियाणे पुरवठा करण्याचा निर्णय कारखान्याने घेतला असल्याची माहिती क्रांतिअग्रणी डॉ. जी. डी. बापू लाड साखर कारखान्याचे अध्यक्ष आमदार अरुण लाड यांनी दिली.

आमदार लाड म्हणाले, की संशोधन केंद्राच्या शिफारशीनुसार कारखान्याकडे उपलब्ध असणाऱ्या एकूण ऊस क्षेत्रापैकी आडसालीचे प्रमाण १५ टक्क्यांपर्यंत असणे आवश्यक आहे. तथापि मागील काही हंगामांचा आढावा घेतल्यास, हे क्षेत्र ४० टक्क्यांहून अधिक वाढले आहे.

लागण तारखेच्या प्राधान्यक्रमानुसार या उसाची तोड जानेवारीअखेर किंवा त्याहून अधिक काळ लांबते. त्याचा परिणाम पुढील तारखेच्या ऊस तोडीवर होतो.

पुढच्या तारखेच्या उसाला लवकर तोडणी येत नसल्यामुळे उत्पादनाचे अर्थशास्त्र समजून न घेता, लवकर तोडणीच्या हव्यासापोटी आडसालीचे क्षेत्र वाढत आहे. कारखान्याचे आडसाली उसाचे क्षेत्र सरासरी एकरी उत्पादन ५६ टन आहे. तोडणीचा कालावधी १८ महिने आहे. या कालावधीनुसार आडसाली उसाचे उत्पादन ३ टन प्रतिमहिना मिळते.

पूर्वहंगामी उसाचे सरासरी एकरी उत्पादन ४५ टन आहे. तोडणीचा कालावधी १५ महिने आहे. या कालावधीनुसार पूर्वहंगामी उसाचेही प्रतिमहिना उत्पादन आडसालीइतकेच मिळते. पूर्वहंगामी लागण आडसालीहून अधिक फायद्याची आहे. यामध्ये खरिपाचे एक पीक घेता येते.

उसाची उगवण, फुटवे, मोठी भरणी या सर्व अवस्था आणि आंतरमशागतीची कामे योग्य वेळी होतात. उत्पादनखर्चात बचत होते, तणाचा प्रादुर्भाव तुलनेने कमी होतो. ऊस पडण्याचे प्रमाण कमी राहते.

या सर्व गोष्टींचा विचार करून, सप्टेंबर ते नोव्हेंबर या कालावधीत कारखान्याच्या बेणेमळ्यातील बियाणे घेऊन जे शेतकरी लागण करतील, त्यांना निम्म्या किमतीत बियाणे पुरवठा करण्याचा निर्णय कारखान्याने घेतला आहे.

जे शेतकरी स्वतःच्या शेतात गादीवाफ्यावर ऊसरोपे तयार करून लागण करतील त्यांना ‘माझी नर्सरी-माझी लागण’ या योजनेतील अनुदानाव्यतिरिक्त बियाणे दराच्या सवलतीचा फायदा मिळणार आहे. इच्छुक शेतकऱ्यांनी १५ ऑगस्टपर्यंत ऊसविकास विभागाकडे या योजनेत सहभागी होण्यासाठी अर्ज करावेत, असे आवाहन त्यांनी केले.