Sugar Production : सातारा जिल्‍ह्यात २७ लाख क्विंटल साखर निर्मिती

Satara News : ऊस गाळपाला गती आली असून जिल्ह्यात दिवसाला ३५ ते ४० हजार टन उसाचे गाळप सुरू आहे. जिल्ह्यात एकूण ३१ लाख ५५ हजार ५३२ टन ऊस गाळपाद्वारे २७ लाख ४१ हजार ७६० क्विंटल साखर निर्मिती झाली आहे. साखर उताऱ्यात संथ गतीने प्रगती सुरू असून सहकारी कारखान्यांची साखर उताऱ्यात आघाडी आहे.

जिल्ह्यात सध्या १५ कारखान्यांकडून उसाचे गाळप सुरू आहे. यामध्ये नऊ सहकारी, तर सहा खासगी कारखान्यांचा समावेश आहे. जिल्ह्यात बहुतांश कारखान्यांनी ३००० ते ३१५० रुपये दर या दरम्यान दर जाहीर केला आहे.

यातील अनेक कारखान्यांनी बिले जमा केली आहेत. जिल्ह्यातील १५ कारखान्यांनी रविवारपर्यंत (ता. १७) एकूण ३१ लाख ५५ हजार ५३२ टन ऊस गाळपाद्वारे २७ लाख ४१ हजार ७६० क्विंटल साखर निर्मिती झाली आहे. हंगाम सुरू होऊन एक महिना जवळपास संपला असलातरी अजूनही साखर उताऱ्यात संथ गतीने प्रगती सुरू आहे.

सध्या सरासरी ८.६९ टक्के मिळत आहे. सहकारी कारखान्यांचा साखर उतारा खासगी कारखान्यांच्या तुलनेत जास्त येत आहे. सहकारी कारखान्यांचा सरासरी ९.९५ टक्के तर खासगी कारखान्यांचा ७.४३ टक्के साखर उतारा मिळत आहे. गाळपात मात्र संख्येने कमी असतानाही खासगी कारखान्यांनी सहकारी कारखान्यांच्या बरोबरीने सुरू आहे.

सहकारी कारखान्यांनी १५ लाख ७८ हजार ३३७ टन गाळपाद्वारे १५ लाख ७० हजार ३३० क्विंटल साखर निर्मिती केली आहे. तर खासगी कारखान्यांनी १५ लाख ७७ हजार १९५ टन गाळपाद्वारे ११ लाख ७१ हजार ४३० क्विंटल साखर निर्मिती केली आहे. ऊस तोडमजूराकडून ऊस तोडणीस पैसे न घेण्यासाठी कितीही निर्बध घातले तरी गपचूप पैसे घेणे सुरूच आहे.

मजुरांची डोकेदुखी कायम

ऊस तोडणीसाठी आवश्यक असणारी मजूर यंत्रणा अनेक कारखान्यांची विस्कळीत झाली आहे. मजुरांच्या मुकादमांनी अनेक ट्रॅक्टर मालक शेतकऱ्यांकडून उचल घेऊन गायब होण्याचे प्रमाण अधिक आहे. यामुळे शेतकऱ्यांची उचल तर गेलीच त्याबरोबर होणारा व्यवसाय बुडणार आहे. या सर्वाचा परिणाम कारखान्यांच्या गाळप होत आहे. ही यंत्रणा विस्कळीत झाल्यावर वेळेत ऊस न तुटण्याबरोबर गाळपासही ऊस कमी पडत असल्याने कारखान्यांची डोकेदुखी वाढली आहे.