Police Patil Remuneration : पोलीस पाटलांचे थकलेले मानधन मिळण्याचा मार्ग मोकळा; चार महिन्यांच्या मानधनापोटी २१.७३ कोटींचा निधी

Pune News : राज्यातील पोलीस पाटलांचे मे महिन्यापासून ऑगस्ट महिन्यापर्यंत असे चार महिन्याचे थकलेले मानधन मिळण्याचा मार्ग मोकळा झाला आहे. राज्य शासनाच्या गृह विभागाने शासन निर्णय काढत चार महिन्यांच्या मानधनापोटी २१ कोटींच्या निधी वितरणाला मान्यता दिली आहे. चार महिन्यांच्या मानधन मिळण्यासह पोलीस पाटलांच्या निवृत्तीचे वय ६० वरून ६५ करावी, अशी मागणी ‘महाराष्ट्र राज्य गावकामगार पोलीस पाटील संघाने केली होती. त्याप्रमाणे आता थकीत मानधनाचा प्रश्न मार्गी लागला असून निवृत्तीच्या वयाचा प्रश्न जैसेथे आहे. यावरही लवकरच निर्णय होण्याची शक्यता आहे.

राज्यातील पोलीस पाटलांचे गेल्या ४ महिन्यांपासून मानधन रखडले होते. त्यावरून नागपूर येथील ‘महाराष्ट्र राज्य गावकामगार पोलीस पाटील संघाच्या ८ व्या राज्यस्तरीय अधिवेशनात उपमुख्यमंत्री फडणवीस यांच्यासमोर या प्रश्न मांडण्यात आला होता. तसेच मानधन लवकर मिळावे अशी मागणी करण्यात आली होती. त्यावेळी पोलीस पाटलांच्या मानधनाचा प्रश्न मार्गी लावू, असे म्हणताना सोमवारी (ता. २) शासन निर्णय निर्गमीत केला जाईल, अशी ग्वाही फडणवीस यांनी दिली होती.

त्याप्रमाणे गृह विभागाने शासन निर्णय काढला असून थकीत मानधनापोटी २१.७३ कोटी आणि वितरीत करण्यात आलेले १३४.५१ कोटी अशा एकूण १५६. २४ कोटी इतक्या निधीच्या वितरणास मान्यता दिली आहे.

नागपूर येथील ‘महाराष्ट्र राज्य गावकामगार पोलीस पाटील संघाच्या ८ व्या राज्यस्तरीय अधिवेशनात फडणवीस यांनी रखडलेल्या मानधनासह सेवानिवृत्तीच्या वयावर वक्तव्य केलं होतं. फडणवीस यांनी पोलीस पाटलांच्या सेवानिवृत्तीच्या वयाच्या मुद्द्यावर राज्य सरकार सकारात्मक असल्याचे म्हटलं होतं. तर सेवानिवृत्तीचे वय ६० वरून ६५ करण्यासाठी मुख्यमंत्री व संबंधितांशी चर्चा करू, असेही आश्वासन उपमुख्यमंत्री फडणवीस यांनी यावेळी दिले होते.