State Cooperative Bank: राज्य सहकारी बँकेचे सोसायट्यांना पाठबळ

Pune News : राज्यातील ३१ जिल्हा सहकारी बँकांपैकी २० बॅंका अडचणीत आहेत. त्याचा परिणाम ग्रामीण भागातील प्राथमिक कृषी सहकारी सोसायट्यांवर झाला, कर्जपुरवठा बंद झाला. त्यामुळे शेतकऱ्यांच्या अडचणी दूर करण्यासाठी आता राज्य सहकारी बँकेने थेट विविध कार्यकारी सोसायट्यांना वित्तपुरवठा करण्याचा निर्णय घेतला आहे. त्यानुसार कार्यवाहीलाही सुरुवात झाली आहे.

राज्यात २१ प्राथमिक कृषी सहकारी सोसायट्या आहेत. ज्या सोसायट्या गेली तीन वर्षे नफ्यात आहेत, ज्यांचा एनपीए १० टक्क्यांपेक्षा कमी आहे आणि आर्थिकदृष्ट्या सक्षम आहेत, अशा सोसायट्यांना थेट वित्तपुरवठा करण्याचा निर्णय राज्य सहकारी बँकेने घेतला आहे. राज्यातील २० जिल्हा सहकारी बॅंका सध्या अडचणीत आल्याने सहकारी संस्थांना कर्जपुरवठा ठप्प झाला असून शेतकरी अडचणीत आले आहेत.

प्राथमिक कृषी सहकारी संस्थांना कर्जपुरवठ्यासाठी केंद्रीय सहकार राज्यमंत्री मुरलीधर मोहोळ यांनी शिखर बँकेला लक्ष घालण्याची विनंती केली. त्यानंतर सोसायट्यांना थेट कर्ज देण्याचा निर्णय राज्य शिखर बँकेने घेतला आहे.

‘या सोसायट्यांना मागणीनुसार कर्जपुरवठा करण्यात येईल,’ असे राज्य बँकेचे प्रशासक विद्याधर अनास्कर यांनी सांगितले. ते म्हणाले, ‘‘योजनेची अंमलबजावणी सुरू झाली आहे. प्राथमिक कृषी सहकारी संस्थांनी जिल्हा बँकेमार्फत राज्य शिखर बँकेकडे संपर्क साधावा.’’