Nagpur News : शेतकऱ्यांच्या सोयाबीनचे दर ५००० रुपयांच्या वर गेले नाहीत; मात्र बियाण्यांसाठी ७५०० ते ८००० रुपये क्विंटल चुकवावे लागत असल्याचे धक्कादायक वास्तव समोर आले आहे. बाजारात सोयाबीन बियाण्यांची २२ आणि ३० किलोच्या बॅगमध्ये विक्री होत आहे. खाद्य तेल आयात-निर्यात धोरणात केंद्र सरकारकडून सतत बदलाचे धोरण अवलंबिण्यात आले. ग्राहकहिताला प्राधान्य देत खाद्य तेलाचे दर नियंत्रणात राहावे याकरिता केंद्र सरकारकडून तसे प्रयत्न झाले.
परिणामी, देशांतर्गत प्रक्रिया उद्योगाची सोयाबीनला यंदा अपेक्षित मागणीच राहिली नाही. त्यामुळे हंगाम संपत असताना देखील सोयाबीनचे दर तेजीत आले नाही. आताही प्रति क्विंटल ४००० ते ४२०० रुपये असा दर सोयाबीनला मिळत आहे. सोयाबीन बियाणे एकरी ३० किलो लागते. सध्या बाजारात विविध कंपन्यांचे वाण उपलब्ध आहेत.
यातील महाबीज तसेच काही खासगी कंपन्यांच्या वाणांना शेतकऱ्यांची मागणी राहते. पूर्व विदर्भातील पाच जिल्ह्यांत सोयाबीन लागवडीखालील सर्वाधीक क्षेत्र आहे. अकोला, वाशीम, बुलडाणा, अमरावती, यवतमाळ या पाच जिल्ह्यांत सुमारे १५.०६ लाख हेक्टरवर सोयाबीन लागवड राहते. या वर्षी या पाच जिल्ह्यांकरिता १ कोटी १२ लाख ५,१४३ लाख क्विंटल बियाण्यांची मागणी करण्यात आली आहे.
...असे आहेत दर
दहा वर्षांवरील सोयाबीन वाण ८५०० रुपये क्विंटल. महाबीजच्या नागपूर विभागीय कार्यालयाकडून मिळालेल्या माहितीनुसार ९३०५ व जेएस-३३५ या बियाण्याला शेतकऱ्यांची मागणी राहते. या दोन्ही वाणांची ३० किलोची बॅग २५५० रुपयांना उपलब्ध आहे. १० वर्षांच्या आतील वाणांमध्ये पीकेव्ही अंबा, सुवर्ण सोया, जेएस- २०११६ या वाणांचा समावेश असून, याची बॅग २२ किलोमध्ये उपलब्ध आहे. १९१५ रुपये (८७ रुपये किलो) असा बॅगचा दर आहे. जेस- २०३४ (एनआरसी १३०), एमएसीएल-१४६० हे बियाणे देखील २२ किलोच बॅगमध्ये असून १९१४ रुपये असा दर आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.