Agrowon Podcast : सोयाबीन वायदे ४ वर्षातील निचांकी पातळीवर; कापूस, सोयाबीन, टोमॅटो, तसेच काय आहेत कांदा दर ?

Market Bulletin : सोयाबीन आणि सोयापेंडच्या भावावरील दबाव कायम आहे. आंतरराष्ट्रीय बाजारात सोयाबीन आणि सोयापेंडच्या वायद्यांनी आज गेल्या ४ वर्षातील निचांकी पातळीवर पोचले होते. सोयाबीनचे वायदे आज दुपारपर्यंत ११.११ डाॅलर प्रतिबुशेल्सवर होते. तर सोयापेंडचे वायदे ३१३ डाॅलर प्रतिटनांवर होते. देशातील बाजारात सोयाबीनची भावपातळी आजही ४ हजार १०० ते ४ हजार ५०० रुपयांच्या दरम्यान होती. हे दर गेल्या तीन महिन्यांपासून कायम आहे. ही स्थिती आणखी काही दिवस राहू शकते, असा अंदाज सोयाबीन सोयाबीन बाजारातील अभ्यासकांनी व्यक्त केला. 

कापसाच्या वायद्यांमध्ये आज पुन्हा काहीशी घट दिसून आली. कापसाचे वायदे आंतरराष्ट्रीय बाजारात दुपारपर्यंत ७०३.६१ सेंट प्रतिपाऊंडच्या दरम्यान होते. तर देशातील वायदे ५७ हजार ९०० रुपये प्रतिखंडीवर होते. बाजार समित्यांमध्ये मात्र भावपातळी काहीशी कायम होती. बाजार समित्यांमध्ये कापसाचे भाव सरासरी ७ हजार १०० ते ७ हजार ८०० रुपयांच्या दरम्यान होते. कापूस बाजारातील ही स्थिती आणखी काही दिवस कायम राहू शकते, असा अंदाज कापूस बाजारातील अभ्यासकांनी व्यक्त केला.

टोमॅटोच्या भावातील सुधारणा कायम आहे. टोमॅटोचा भाव मागील दोन दिवसांमध्ये पुन्हा २०० रुपयांपर्यंत वाढला आहे.  बाजारातील कमी आणि चांगला उठाव, याचा टोमॅटोच्या बाजाराला आधार मिळत आहे. टोमॅटोचा बाजार सरासरी ३ हजार ७०० ते ४ हजार ३०० रुपयांच्या दरम्यान पोचला. राज्यातील अनेक भागात पुढील काळात पाऊस वाढण्याचा अंदाज आहे. त्यामुळे टोमॅटोची आवक आणखी घटण्याची शक्यता व्यक्त केली जात आहे. त्यामुळे टोमॅटोचे भाव टिकून राहण्याचा अंदाज आहे, असे व्यापारी सांगत आहेत. 

कांद्याचे भावातील चढ उतार काही प्रमाणात सुरुच आहेत. कांद्याची बाजारातील आवकही काहीशी स्थिरावले होती. तर मागणी कायम आहे.  सध्या कांद्याचा सरासरी भाव २३०० ते २६०० रुपये प्रतिक्विंटलच्या दरम्यान दिसून येत आहे. बाजारातील आवक कमी असली तरी वाढलेल्या भावात सध्या कांद्याला उठाव जास्त मिळत नसल्याचे व्यापारी सांगत आहेत. मात्र यापुढच्या काळात कांद्याची बाजारातील आवक आणखी कमी होण्याची शक्यता आहे, असा अंदाज कांदा बाजारातील व्यापारी व्यक्त करत आहेत.

मागील वर्षभर आल्याला चांगला भाव मिळाला. त्यामुळे नव्या हंगामात लागवडीसाठी आले बियाण्याला चांगली मागणी वाढली. याचा आधार आल्याच्या बाजाराला मिळत आहे. आल्याचे भाव देशातील बाजारात टिकून आहेत. बाजारातील आवक कमी असल्याने सध्या आल्याचे भाव सरासरी भावापातळी सध्या ६ हजार ते १० हजार रुपयांच्या दरम्यान दिसून येत आहे. आल्याची ही भावपातळी आणखी काही दिवस टिकून राहू शकते. तर पुढील काळात बाजारातील आवक कमी झाल्यानंतर दाराला काहीसा आधार मिळेल, असा अंदाज व्यापारी व्यक्त करत आहेत.