Banana Farming: खानदेशात मृग बहर केळी लागवड वाढण्याचे संकेत

Jalgaon News: खानदेशात मृग बहरातील अर्ली केळी लागवड पूर्ण झाली आहे. यंदा केळी लागवड खानदेशात सुमारे आठ ते १० हजार हेक्टरने वाढू शकते, असे संकेत आहेत. केळीचे दर मध्यंतरी कमी झाले होते. सध्या दर टिकून आहेत. इतर पिकांमध्ये शेतकऱ्यांना फटका सहन करावा लागला आहे. कारण दर कमी अधिक झाले.

केळी पीक शेतकऱ्यांना बऱ्यापैकी परवडले. कांदेबाग केळी व मृग बहर केळीचे उत्पादनही बऱ्यापैकी आले. जळगाव जिल्ह्यात मृग बहर केळीची काढणी मार्च अखेरीस सुरू होते. तर कांदेबाग केळीची काढणी दसरा सणापासून सुरू होत असते. सध्या उशिराच्या मृग बहर केळीची काढणी काही भागात सुरू आहे.

या केळीला किमान १४०० व कमाल २२०० रुपये प्रतिक्विंटलचा दर मिळाला आहे. मृग बहर केळीची लागवड मे महिन्यात सुरू होते. अर्ली लागवड मे महिन्याच्या दुसऱ्या आठवड्यात केली जाते. ही लागवड पूर्ण झाली आहे. नियमीत लागवड जूनच्या मध्यापासून सुरू होते.

रोपांना मागणी

या केळीसाठी शेतकरी उतिसंवर्धित रोपांचा उपयोग करीत आहेत. ही रोपे खानदेशात विविध कंपन्यांतर्फे पुरविली जात असून, रोपांचा पुरवठा सुरळीत आहे. जागेवर १८ ते २१ रुपये प्रतिरोप, असे दर रोपांचे आहेत. रोपांच्या चांगल्या उगवणक्षमतेसाठी कीडनाशके व अन्य बाबींची आळवणी रोपांभोवती करीत आहेत. कुकुंबर मोझॅकला प्रतिबंधात्मक कार्यवाही केली जात आहे.