Siddheshwar Sugar Factory : ‘सिद्धेश्वर’ने पुन्हा त्याच जागी चिमणीसाठी परवानगी मागितली

Solapur News : श्री सिद्धेश्वर साखर कारखाना सुरळीत चालण्यासाठी पूर्वीच्याच जागेवर ५० ते ६५ मीटर उंचीची चिमणी उभारणीस परवानगी मिळावी, अशी मागणी पुन्हा कारखान्याच्या वतीने माजी अध्यक्ष धर्मराज काडादी यांनी ‘डीजीसीए’कडे (नागरी विमान वाहतूक महासंचालनालय) केली आहे.

मात्र, ५० मीटरपेक्षा जास्त उंचीची चिमणी त्याच ठिकाणी उभारल्यास होटगी रोड विमानतळास पुन्हा अडचणी येऊ शकते, असे विमानतळ विकास प्राधिकरणाने ‘डीजीसीए’समोर स्पष्ट केले आहे.

नागरी विमान वाहतूक महासंचालनालयाने (डीजीसीए) नुकतेच सोलापूर विमानतळाचे वरिष्ठ अधिकारी व श्री सिद्धेश्वर साखर कारखान्याच्या अधिकाऱ्यांचे म्हणणे ऐकून घेतले. तत्पूर्वी, चार-पाच वेळा यासंदर्भात 'डीजीसीए'कडे बैठका पार पडल्या असून, काही दिवसांत अंतिम निर्णय अपेक्षित आहे.

तूर्तास ‘आमचा कारखाना सुरळीत चालू राहावा, यासाठी पूर्वीच्या चिमणीच्या जागेवरच ५० ते ६५ मीटरपर्यंत चिमणी उभारायला परवानगी द्या’ असे म्हणणे कारखान्याच्या वतीने श्री. काडादी यांनी दिले आहे. ५० मीटरपेक्षा कमी उंचीची चिमणी कारखान्यासाठी कोणत्याही फायद्याची नाही, असेही कारखाना प्रशासनाकडून ‘डीजीसीए’ला सांगण्यात आले.

त्यामुळे ‘तुमच्या नियमात बसेल एवढ्या उंचीची चिमणी उभारू, पण किमान ५० ते ५५ मीटरपेक्षा कमी नकोच’ अशी भूमिका श्री सिद्धेश्वर कारखाना प्रशासकांनी घेतली आहे. त्यावर ‘डीजीसीए’ निर्णय घेणार आहे. शेतकऱ्यांचा कारखाना सुरळीत चालावा म्हणून चिमणी पाडू नये, यासाठी खूप प्रयत्न केले.

पण, अडथळ्यांचा सर्व्हे चुकलेला असतानाही नगरविकास विभागाचा नियम पुढे करून चिमणी जमीनदोस्त करण्यात आली. आता कमी उंचीची चिमणी उभारायला परवानगी मागत आहोत, पण त्यावर निर्णय झालेला नाही. आतापर्यंत सहावेळा ‘डीजीसीए’च्या अधिकाऱ्यांशी बैठका झाल्या आहेत. पुढच्या काही दिवसांत सकारात्मक निर्णय अपेक्षित आहे, असे कारखान्याचे माजी अध्यक्ष धर्मराज काडादी यांनी सांगितले.