Fodder Shortage : माळरानातही चारा संपला; खानदेशात टंचाईची स्थिती

Jalgaon News : खरिपात चारा पिकांची कमी पेरणी झालेली असतानाच अतिपावसाने खानदेशात चाऱ्याची स्थिती खराब झाली. आता माळरानातही चारा नाही. यामुळे चारा टंचाईची स्थिती आहे. माळरानात हिरवळ नाहीशी झाली आहे. खरिपात मका, ज्वारी पेरण्या खानदेशात कमी झाल्या होत्या. अतिपावसात मका, ज्वारीचा कडबा काळवंडला आहे. सोयाबीनचा भुसाही खराब झाला.

या कारणांमुळे खानदेशात शेतकऱ्यांनी साठविलेला चारा पशुधनासा घातला. हा चाराही संपत आला आहे. सध्या चाराटंचाई दिसत आहे. कारण माळरानासह पऱ्हाटी, तुरीचे शिवारही उजाड झाले आहे. त्यात चारा नाही. रब्बी पिकांचा चारा मार्चमध्ये उपलब्ध होईल. यामुळे चाऱ्यासाठी मोठा खर्चही करावा लागत आहे.

डिसेंबरमध्ये माळरानात हिरवळ असल्याने त्यात पशुधन चराईसाठी जात होते. पण सध्या हिरवळ नाहीशी झाली आहे. चाऱ्याची समस्या तयार झाली आहे. भाकड पशुधनास पोटभर चारा खाऊ घालणे अनेकांना कठीण बनले आहे. खानदेशात सुमारे १६ लाख पशुधन आहे. यात जळगाव जिल्ह्यात साडेआठ लाख पशुधन आहे.

खानदेशात दर महिन्याला पावणेतीन लाख टन चाऱ्याची गरज असते. जळगावमधील चाळीसगाव, पाचोरा, रावेर, यावल, चोपडा, पारोळा, धुळ्यातील शिरपूर, धुळे, नंदुरबारमध्ये नंदुरबार, शहादा हा भाग दूध उत्पादनात अग्रेसर आहे. यात शेळ्या-मेढ्यांची आणखी मोठी संख्या आहे. परंतु पशुधनाला पुढे पुरेसा चारा कसा आणावा, असा मुद्दा आहे.

दुधाळ पशुधनाला कोरडा चारा एकवेळ खाऊ घालावा लागतो. परंतु या पशुधनास एकवेळ कोरडा चारा किंवा कुट्टी, भुसा खाऊ घालणे कठीण झाले आहे. अनेकांनी आपल्याकडे हिरव्या चाऱ्याची लागवड केली आहे. त्याचा उपयोग शेतकरी करून घेत आहेत.

 कोरडवाहू क्षेत्रात अधिक समस्या

सध्या केळी पट्ट्यात फुटवे, कंद, केळीची हिरवी पाने आदी पशुधनास घातली जात आहेत. अनेकांनी साठविलेला चारा संपला आहे. केळी पट्ट्यात चारा मुबलक असणार आहे. परंतु कोरडवाहू पिकांच्या क्षेत्रात चाऱ्याची समस्या तयार झाली आहे. ही समस्या जळगावात अमळनेर, पारोळा, चाळीसगाव, बोदवड, धुळ्यातील शिंदखेडा, साक्री, नंदुरबारमधील नंदुरबार येथे अधिक आहे.