Women Empowerment : जिल्हा वार्षिक योजनेतून द्यावयाच्या निधीसाठी ‘माविम’ने प्रस्ताव द्यावेत

Chh. Sambhajainagar News : महिला बचत गटांना कृषी प्रक्रिया उद्योग क्षेत्रात वाव असून त्यात त्यांनी पदार्पण करावे, त्यासाठी महिला आर्थिक विकास महामंडळाने त्यांना प्रशिक्षण, अर्थसाह्य, बाजारपेठ उपलब्धता करून द्यावी. जिल्हा वार्षिक योजनेतून द्यावयाच्या निधीसाठीही माविमंने प्रस्ताव सादर करावेत, असे निर्देश अपर जिल्हाधिकारी संभाजीराव अडकुणे यांनी दिले.

महिला आर्थिक विकास महामंडळाच्या जिल्हा सल्लागार समितीची बैठक शुक्रवारी (ता. ६) पार पडली. कृषी उपसंचालक दीपक गवळी, सहायक आयुक्त पशुसंवर्धन डॉ. रमण इंगळे, सहायक मत्स्यव्यवसाय अधिकारी यू. व्ही. पवार, जिल्हा ग्रामीण विकास यंत्रणेचे सचिन सोनवणे, अजित भामरे. मॅग्नेटचे प्रकल्प अधिकारी अरुण नादरे, माविमंचे जिल्हा समन्वयक चंदनसिंग राठोड यांच्यासह बॅंक प्रतिनिधी आदी उपस्थित होते.

सद्यःस्थितीत नवतेजस्विनी उपक्रमाअंतर्गत वडोद बाजार (ता. फुलंब्री), रघुनाथ नगर (ता. गंगापूर), शेरेगाव (लासूर स्टेशन), बिडकीन (ता. पैठण, ब्राह्मणगाव), अन्वी (ता. सिल्लोड) येथे सुधारित शेळीपालन व शेळी खरेदी-विक्री केंद्र स्थापन करण्यासाठी, तसेच जीवामृत व द्रव युनिट, दुग्ध व्यवसाय व पनीर उद्योग, मदर पोल्ट्री युनिट स्थापन करण्यासाठी अर्थसाह्य महिला बचत गटांना देण्यात आले आहे. तेजस्विनी उपप्रकल्पाअंतर्गत टेंभापुरी (ता. गंगापूर) येथे डालमिल युनिट १०० महिला मिळून चालविणार आहेत.

मिरची संकलन व प्रोसेसिंग युनिट, कृषी संच, धान्य क्लिनिंग-ग्रेडिंग युनिट, वेअर हाऊस अशा विविध क्षेत्रात महिला बचत गट कार्यरत होत आहेत, अशी माहिती या वेळी देण्यात आली. या प्रकल्पांसाठी जिल्हा वार्षिक नियोजन समितीमार्फत राखीव असलेल्या निधीसाठीही प्रस्ताव सादर करण्यात येत आहेत, असेही सांगण्यात आले. सर्व प्रकल्पांसाठी महिलांना प्रशिक्षण देण्यात यावे. त्यांना बाजारपेठ लिकिंग करून द्यावे, असेही निर्देश अपर जिल्हाधिकारी अडकुणे यांनी दिले.

२२०३ महिला बचत गट

जिल्ह्यात महिला आर्थिक विकास महामंडळाचे २२०३ महिला बचत गट आहेत. त्यात २२ हजार ८७० महिला सभासद आहेत. या महिलांसाठी नवतेजस्विनी महाराष्ट्र ग्रामीण महिला उद्यम विकास प्रकल्प, अल्पसंख्याक महिला सक्षमीकरण कार्यक्रम, राष्ट्रीय नागरी उपजीविकास अभियान, वॉटर सॅनिटेशन कार्यक्रम असे विविध उपक्रम राबविले जाऊन त्यांच्यातील उद्यमशीलतेला चालना दिली जाते. गत वर्षात (२०२४-२५) ११६९ बचत गटांना ४४ कोटी १३ लक्ष ४० हजार रुपयांचा पतपुरवठा करण्यात आला आहे.