Washim Rain Update : वाशिमला अवकाळी पावसाचा तडाखा; शंभर एकरावरील बीजवाई कांदा भुईसपाट

Pune News : हवामान विभागाने दर्शवलेल्या अंदाजाप्रमाणे गेल्या दोन दिवसापासून विदर्भात अवकाळी पावसाने विजांच्या कडकडाटासह हजेरी लावली. रविवारी (ता.१७) वाशिम जिल्ह्यात दुपारनंतर अचानक वातावरणात बदल झाल्याने कोठे हलका तर कुठे मध्यम स्वरूपाचा पाऊस झाला. दरम्यान जिल्ह्यातील मंगरुळपीर तालुक्याला जोरदार पावसाने झोडपले. यामुळे येथील शंभर एकरावरील बीजवाई कांदा (बियाणे) भुईसपाट झाला. यामुळे शेतकऱ्याचे आर्थिक नुकसान झाले आहे. 

हवामान विभागाने विदर्भाला वादळी वाऱ्यासह पाऊस आणि गारपिटीची शक्यता वर्तवली होती. याप्रमाणे रविवारी (ता.१७) दुपारी अवकाळी पावसाने वाशिममध्ये अचानक हजेरी लावली. जिल्ह्यातील बहुतांश भागात कुठे हलका, कुठे मध्यम स्वरूपाचा पाऊस झाला. तर मंगरुळपीर तालुक्यातील तपोवन भागासह तराळा, शेलू बाजार भागात कांदा, बीजवाई कांदा व इतर पिकांना जोरदार पावसाचा तडाखा बसला. येथे दुबार लागवड केलेला बीजवाई कांदा अवकाळी पावसामुळे भूईसपाट झाला आहे. यामुळे आधीच संकटात सापडलेला शेतकरी पुन्हा एकदा संकटात सापडला आहे.

याआधी पावसासह गारपीट 

याआधी जिल्ह्यातील कारंजा व मंगरूळपीर तालुक्यात फेब्रुवारीमध्ये अवकाळी पावसासह गारपीट झाली होती. यामुळे तालुक्यातील वनोजा, शिवनी शेलुबाजारासह अनेक ठिकाणी गहू, हरभरा, संत्रा फळबागेचे नुकसान झाले होते. 

आर्थिक मदतीची मागणी

यंदा अवकाळी पावसामुळे आधी फेब्रुवारीमध्ये गहू, हरभरा, संत्रा फळबागेचे नुकसान झाले होते. तेव्हा नुकसानीचे पंचनामे त्वरित करून शासनाने आर्थिक मदत करावी, अशी मागणी शेतकऱ्यांनी जिल्हा प्रशासनाकडे केली होती. संकटातून येथील शेतकरी बाहेर पडत नाहीत, तोच पुन्हा एकदा अवकाळी पावसामुळे लागवड केलेला बीजवाई कांद्याची लागवड करावी लागणार आहे. यामुळे शेतकरी हवालदील झाला आहे. 

दरम्यान १८ आणि १९ मार्च रोजी नागपूरला हवामान विभागाकडून ऑरेंज अलर्ट देण्यात आला होता. तसेच वादळी वाऱ्यासह पाऊस आणि गारपिटीची शक्यता वर्तविण्यात आली होती. तसेच जिल्हा आपत्ती व्यवस्थापन प्राधिकरणाकडून गरज नसताना घराबाहेर पडून नका, असे आवाहन नागरिकांना करण्यात आले होते.