MLA Rajendra Shingane : शेतीमाल विक्रीला महत्त्व आवश्यक : आमदार शिंगणे

Buldana News : शेतकरी शेतीमाल उत्पादन वाढविण्यासाठी कोणतीही कसूर ठेवत नाहीत. पिकविण्यासाठी जेवढे महत्त्व देतो तेवढे विकण्यालाही महत्त्व दिल्याशिवाय शेतकरी उन्नत होणार नाही, असे मत माजीमंत्री आमदार राजेंद्र शिंगणे यांनी व्यक्त केले.

साखरखेर्डा येथे आयोजित कृषी योद्धा सन्मान सोहळ्यात आमदार शिंगणे बोलत होते. ज्ञानेश्‍वर खरात पाटील यांच्या कृषी योद्धा फाउंडेशनच्या वतीने शेतीमध्ये उल्लेखनीय कार्य करणाऱ्या शेतकरी, तसेच कृषी योद्धांच्या सन्मान करण्यासाठी कार्यक्रम घेण्यात आला. या वेळी ते प्रमुख मार्गदर्शक म्हणून बोलत होते.

या वेळी काँग्रेसचे जिल्हाध्यक्ष राहुल बोंद्रे, रविकांत तुपकर व एकनाथ थुट्टे, राहुरी कृषी विद्यापीठाचे संशोधक डॉ. मिलिंद देशमुख, कापूस संशोधक डॉ. अनंत इंगळे, गेवराईचे (ता. फुलंब्री) सरपंच मंगेश साबळे, ज्ञानेश्‍वर खरात यांची प्रमुख उपस्थिती होती.

या वेळी तुपकर, बोंद्रे, डॉ. देशमुख, डॉ. इंगळे, सरपंच साबळे यांनीही शेतकऱ्यांना मार्गदर्शन केले. कृषी सन्मान मुख्य सोहळ्यात महाराष्ट्रातील विविध भागांत शेतीत आपला वेगळा ठसा उमटविणाऱ्या २० कृषी योद्ध्यांचा मान्यवरांच्या हस्ते पुरस्कार करण्यात आला.

श्रेया दत्तात्रेय माने, कृषी पर्यटन केंद्राचे संचालक मोहन तेजराव जगताप, गेवराईचे सरपंच मंगेश साबळे, वैरागड येथील पवन जगन्नाथ साठे, जय बिरसा मुंडा शेतकरी गटाचे निरंजन पोटे आणि सहकारी, कृषी यंत्र निर्मिती उद्योजक पंढरी अप्पा गुंजकर, अमोल थुट्टे, राजू मोहदे, निवृती खरात व सोपान खरात, कृषी शास्त्रज्ञ डॉ. चंद्रकांत जायभाये, डॉ. अनिल तारू, प्रयोगशील शेतकरी विनोद देशमुख, हरिभाऊ येवले, दत्तात्रेय टेकाळे, संदीप पिसे, कृषी शास्त्रज्ञ डॉ. मिलिंद देशमुख, शेतकरी विजयराव अंभोरे, अवचितराव पालकर, संजय खेडेकर, श्रेयस सतीश दस्तुरे, शुभम चव्हाण यांना सन्मानित करण्यात आले.

कार्यक्रमाचे प्रास्ताविक ज्ञानेश्‍वर खरात यांनी केले. सूत्रसंचालन किरण वाघमारे यांनी, तर आभार शिवाणी खरात यांनी मानले.