Farm Road Issue : ग्रामीण मार्ग, शेतरस्त्यांना हवा निधी

Jalgaon News : खानदेशात विविध भागांतील रस्त्यांसाठी शासनाने मोठा निधी देण्याची मागणी केली जात आहे. यात नंदुरबारमधील नवापूर, नंदुरबार, धुळ्यातील साक्री आदी भागांत ग्रामीण मार्ग, शेतरस्त्यांसाठी निधीची मागणी होत आहे.

मध्यंतरी नंदुरबारमध्ये २४ कोटी २० लाखांचा निधी मंजूर केला होता. पण अन्य भागात निधी समान किंवा हवा तसा आला नाही. ग्रामीण भागातील रस्त्यांची झालेली दुरवस्था, वाहनांचा वाढता भार लक्षात घेता दुरुस्ती, मजबुतीकरण आणि डांबरीकरणासाठी निधीची गरज आहे.

आदिवासी पट्ट्यातील शेतरस्ते, ग्रामीण रस्त्यांची दैन्यावस्था आहे. त्यामुळे या रस्त्यांच्या कामासाठी निधी उपलब्ध करून देण्याची मागणी लोकप्रतिनिधींनी सतत केली आहे. पण सर्वत्र निधी दिला जात नाही.

सततची मागणी व गरज लक्षात घेता नंदुरबारमध्ये २४ कोटी २० लाख रुपये निधी शासनाने मंजूर केला. त्यात बिगरआदिवासी क्षेत्रातील गावांसाठी १९ कोटी ६० लाख, तर आदिवासी क्षेत्रातील गावांसाठी चार कोटी ६० लाखांचा निधी मंजूर करण्यात आला होता.

नंदुरबारमधील कोपर्ली ते कंढ्रे रस्त्यासाठी ६० लाख, बह्याने ते आराळे रत्यासाठी ४० लाख, कोपर्ली ते शेल्टी रस्त्यासाठी एक कोटी, कार्ली ते कांड्रे रस्त्यासाठी लाख ४० लाख, जुनमोहिदा ते तिसी स्टेशन ८० लाख, न्याहली, बलदाणे, भादवड-सतुरखे रस्ता एक कोटी, इजिमा ५४ ते मालपूर रस्ता ७५ लाख, तलवाडे ते नंदुरबार तालुका हद्दीस मिळणारा रस्ता ७५ लाख,

होळ ते तिसी स्टेशन रस्ता ७५ लाख, आसाणे ते ठेलारपाडा रस्ता ५० लाख, नंदुरबार तालुक्यातील प्रजिमा-१७ ते सैताने रस्ता २५ लाख, घोताणे ते आसाने रस्ता ३० लाख, तलवाडे बुद्रुक ते प्रजिमा-५४ ला मिळणारा रस्ता ५० लाख, रनाळे ते रजाळे रस्ता ५० लाख, रनाळे ते धंडाणे एक कोटी रस्ता, रनाळे ते धंडाणे रस्त्यावर चार स्लेबड्रेन बांधणे ९० लाख, यासह अन्य रस्त्यांचा समावेश होता.