Pune News : राज्यात अन्नप्रक्रिया उद्योग सुरू करणाऱ्या लाभार्थ्यांना मार्चअखेरपर्यंत अडीचशे कोटी रुपयांचे अनुदान मिळण्याची शक्यता आहे.पंतप्रधान सूक्ष्म अन्न प्रक्रिया उद्योग योजनेतून (पीएमएफएमई) अनुदान मिळण्यासाठी https://pmfme.mofpi.gov.in/ या संकेतस्थळावर सध्यादेखील अर्ज मागविले जात आहेत. पात्र अर्जदारांना २०२४-२५ या चालू आर्थिक वर्षात आतापर्यंत १८७ कोटी रुपयांचे अनुदान वाटले गेले आहे.
विशेष म्हणजे यातून ग्रामीण व शहरी भागातील स्वयंसाह्यता गटांमधील ३३ हजार लाभार्थ्यांना ११४ कोटी रुपयांचे बीज भांडवल मिळाले आहे. आतापर्यंत या योजनेतून २१ हजार वैयक्तिक, २९८ समूह व ३९ प्रकरणांमध्ये सामाईक पायाभूत सुविधांना अनुदान देण्यात आले आहे. केंद्राने या योजनेच्या अनुदानाकरिता आतापर्यंत १९३ कोटी रुपये; तर राज्याने ७५ कोटी रुपये उपलब्ध करून दिले होते. त्यापैकी वाटप १८७ कोटी रुपये झाले आहेत. तसेच पुढील चार आठवड्यांत अडीचशे कोटी रुपये वाटण्यासाठी नियोजन केले जात आहे, अशी माहिती कृषी आयुक्तालयाच्या सूत्रांनी दिली.
‘पीएमएफएमई’मुळे राज्यातील बेरोजगार शेतकरी युवक, महिला, वैयक्तिक उद्योजक, स्वयंसाह्यता समूह, शेतकरी उत्पादक संस्था, शेतकरी उत्पादक कंपन्या, सहकारी संस्था तसेच कोणत्याही भागीदाराला किंवा भागीदार संस्थेला अन्न प्रक्रिया व्यवसायासाठी अनुदान मिळण्याची सोय झाली आहे. प्रकल्प खर्चाच्या ३५ टक्क्यांपर्यंत किंवा जास्तीत जास्त दहा लाखांपर्यंत अनुदान मिळत असल्यामुळे योजनेला प्रतिसाद मिळतो आहे. केंद्र शासनाने या योजनेत अर्जाची प्रक्रिया पारदर्शक ठेवली आहे.
तसेच जिल्हाधिकाऱ्यांच्या अध्यक्षतेखालील समितीला अर्ज मंजुरीचे अधिकार दिले आहेत. तसेच अर्ज भरणे, अहवाल तयार करणे किंवा बॅंकेतून कर्ज मंजूर करण्यासाठी अनेकदा शेतकऱ्यांना अडचणी येतात. त्यामुळे दलाल किंवा मध्यस्थांची मदत घ्यावी लागते. ते टाळण्यासाठी ‘पीएमएफएमई’मध्ये केंद्राने स्वतःहून प्रतिनिधी नियुक्त केले आहेत. त्यामुळे प्रत्येक तालुक्यात २० प्रतिनिधी उपलब्ध असून, त्यांना सेवा शुल्काची रक्कम लाभार्थ्यांऐवजी थेट सरकारी निधीतून दिले जात आहे.
गट सदस्याला मिळतात ४० हजार रुपये
‘पीएमएफएमई’ योजनेतून राज्यातील स्वयंसाह्यता समूह किंवा गटाला जास्तीत जास्त चार लाख रुपये बीज भांडवल मिळू शकते. प्रत्येक सदस्याला कमाल ४० हजार रुपये भांडवल देण्याची तरतूद या योजनेत आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.