Crop Stress : उन्हाच्या तीव्रतेमुळे पिकांची तहान वाढली

Parbhani News : परभणी, हिंगोली जिल्ह्यांत यंदा फेब्रुवारीपासूच उन्हाचा चटका जाणवत आहेत. कमाल तापमानात सामान्य तापमानापेक्षा अधिक वाढ झाली आहे. उशिरा पेरणी केलेली रब्बी पिके तसेच उन्हाळी पिके, फळे भाजीपाला पिकांची वाढ तसेच उत्पादनावर परिणाम झाला आहे. बाष्पोत्सर्जनाचा वेग वाढल्याने उन्हाळी पिकांची पाण्याची गरज वाढली आहे. दुधाळ पशुधनास पाणी कमी पडत असल्यामुळे दुग्धव्यवसायावर परिणाम झाला आहे.

परभणी व हिंगोली जिल्ह्यांत गतवर्षीच्या पावसाचे प्रमाण अधिक राहिले. त्यामुळे सिंचन स्रोताना मुबलक पाणी उपलब्ध झाले होते. परंतु बेसुमार उपसा तसेच तापमानात झालेली वाढ यामुळे अनेक भागांतील विहिरींनी जानेवारी महिन्यात तळ गाठला.

वसंतराव नाईक मराठवाडा कृषी विद्यापीठातील कृषी हवामानशास्त्र विभागाच्या वेधशाळेत घेतलेल्या नोंदीनुसार यंदा फेब्रुवारी महिन्यात कमाल तापमानात सामान्य तापमानापेक्षा १ ते ३ अंश सेल्सिअसने वाढ झाल्याचे स्पष्ट झाले.

वेळेवर पेरणी केलेल्या रब्बी ज्वारी, गहू, हरभरा पिकांची सुगी सुरू आहे. उन्हामुळे सकाळी लवकर तसेच दुपारी चार नंतर काढणीची कामे करावी लागत आहेत. तापमानातील वाढ आणि पाण्याच्या कमतरतेमुळे उशिरा पेरणी केलेला गहू, ज्वारी पिके सुकत आहेत.

टोमॅटो, विविध प्रकारच्या पालेभाज्या सुकत आहेत. कलिंगडाच्या फलधारणेवर परिणाम झाला आहे. केळी, ऊस पिकांची पाने करपत आहेत. सकाळी थंड आणि दिवसभराच्या उन्हामुळे आजाराचे प्रमाण वाढले आहे.

कमाल तापमान

तारिख २०२४ २०२५ फरक

२१ फेब्रुवारी ३४.७ ३४.६ उणे ०.१

२२ फेब्रुवारी ३२.६ ३४.७ अधिक २.१

२३ फेब्रुवारी ३०.८ ३४.० अधिक ३.२

२४ फेब्रुवारी ३२.४ ३५.० अधिक २.६

२५ फेब्रुवारी ३२.५ ३४.० अधिक १.५

किमान तापमान

तारिख २०२४ २०२५ फरक

२१ फेब्रुवारी १३.० १२.८ उणे ०.२

२२ फेब्रुवारी १२.७ १३.५ अधिक ०.८

२३ फेब्रुवारी १२.५ १३.२ अधिक ०.७

२४ फेब्रुवारी ११.४ १४.० अधिक २.६

२५ फेब्रुवारी १२.२ १२.५ अधिक ०.३