ZP Akola : अकोला जिल्हा परिषदेत ओल्या दुष्काळाबाबत ठराव मंजूर

Akola News : यंदा जिल्ह्यात सातत्याने पाऊस झाल्याने खरीप हंगामाचे मोठे नुकसान झाले. त्यामुळे शासनाने जिल्ह्यात ओला दुष्काळ जाहीर करावा, अशी मागणी असलेला ठराव जिल्हा परिषदेच्या कृषी समिती सभेत घेण्यात आला. हा प्रस्ताव शासनाकडे पाठवला जाणार आहे.

बुधवारी (ता. ११) जिल्हा परिषद कृषी व पशुसंवर्धन समिती सभापती योगिता रोकडे यांच्या अध्यक्षतेखाली कृषी समिती सभेत हा ठराव घेतल्या गेला. सभेत या वेळी अनेक विषयांवर चर्चा करण्यात आली.

नीता गवई, अर्चना राऊत, रायसिंग राठोड, बार्शीटाकळी पंचायत समिती सभापती सुनंदा मानवतकर आदी समिती सदस्य बैठकीला उपस्थित होते. सभेचे कामकाज कृषी विकास अधिकारी डॉ. तुषार जाधव यांनी पार पाडले.

जिल्हा कृषी अधिकारी मिलिंद जंजाळ, जिल्हा कृषी अधिकारी (सामान्य) सुनंदा दळवी, गजानन गायकवाड आदी कृषी विभागाचे अधिकारी व कर्मचारी उपस्थित होते.

शेतकऱ्यांचे अतोनात नुकसान झाले असून खरिपातील पिके येणे अशक्य आहे. शेतकऱ्यांचे नुकसान लक्षात घेता ओला दुष्काळ जाहीर करून सरसकट भरपाई द्यावी, असा ठराव सभापती रोकडे यांनी मंजूर केला.