Meat Refrigeration Process : मांस टिकविण्यासाठी शीतकरण प्रक्रिया गरजेचीच!

Nagpur News : दोन तासांपेक्षा अधिक काळ कापून ठेवलेल्या मांसावर नैसर्गिक नियमाप्रमाणे जिवाणू सक्रिय होतात. त्यानंतर हे मांस खराब होण्यास सुरुवात होते. त्यामुळे मांस दोन ते अडीच तासांपेक्षा अधिक काळ कापून ठेवलेले असल्यास ते खाण्यायोग्य राहत नसल्याचा धक्‍कादायक दावा हैदराबाद येथील केंद्रीय मांस संशोधन संस्थेचे संचालक डॉ. एस. बी. बारबुद्धे यांनी केला आहे. आपल्याकडील उघड्यावर लटकवून मांस विकण्याच्या पद्धतीऐवजी कापल्यानंतर मांस टिकविण्यासाठी आठ ते दहा तासाची शीतकरण प्रक्रिया गरजेचीच असल्याचेही त्यांनी स्पष्ट केले.

शुक्रवारी (ता. ४) रोजी नागपूर दौऱ्यावर असलेल्या डॉ. बारबुद्धे यांनी ‘ॲग्रोवन’शी संवाद साधताना दिलेल्या माहितीनुसार, जंगलातील बहुतांश प्राणीही शिकारीनंतर तत्काळ ताजे मांस खाण्यावरच भर देतात. प्राणी मेल्यानंतर काही काळ लोटल्यास त्यात जीवाणू सक्रिय होऊन मांस खराब होण्यास सुरुवात होते.

मांसासाठी शेळी-मेंढी कापल्यानंतर ग्राहकांना दिसेल अशा प्रकारे उघडी लटकवली जाते. सकाळी लवकर कापलेल्या या प्राण्याचे मांस अनेक वेळा संध्याकाळपर्यंत दीर्घकाळ उघड्यावर राहते. खरे तर दोन ते अडीच तासापर्यंत ताज्या मांसांचे सेवन करणे गरजेचे असते. त्यापेक्षा अधिक काळ राहिलेल्या मांसाची लवचिकता कमी होते, तसेच ते मांस खराब होऊन खाण्यायोग्य राहत नाही. हे टाळण्यासाठीच मांस कापल्याबरोबर ते कोल्ड स्टोअरेजमध्ये ठेवण्याची शिफारस केली आहे.