Loan Recovery Issues : ‘बहिणीं’च्या पैशातून बँकांची वसुली

Amravati News : राज्यात सध्या ‘मुख्यमंत्री माझी लाडकी बहीण’ योजनेची धूम सुरू असून, रक्षाबंधनाच्या पर्वावर हजारो महिलांच्या खात्यात या योजनेचे तीन हजार रुपये जमा झालेले आहेत. मात्र हीच संधी साधून काही बॅंकांकडून महिलांकडे असलेल्या इतर कर्जांचे हप्ते परस्पर वसूल करण्यात येत असल्याच्या अनेक तक्रारी समोर आल्या आहेत. त्यामुळे महिलांमध्ये संताप व्यक्त होत असून, जिल्हाधिकाऱ्यांनी बॅंकांना थेट इशारा दिला आहे. लाडकी बहीण खात्यावरील पैसे वळते केल्यास बॅंकेविरुद्ध कारवाई केली जाईल, असा इशाराच जिल्हाधिकारी सौरभ कटियार यांनी दिला आहे.

मुख्यमंत्री माझी लाडकी बहीण योजनेअंतर्गत अमरावती जिल्ह्यात जवळपास साडेतीन लाखांवर महिलांचे अर्ज आले. त्यापैकी बहुतांश महिलांच्या खात्यात योजनेची रक्कम वळती झाल्याचा दावा प्रशासनाकडून करण्यात येत आहे. मात्र काही बॅंका महिलांकडे असलेल्या इतर कर्जांची वसुली या रकमेतून करीत असल्याची तक्रार जिल्हाधिकाऱ्यांकडे प्राप्त झाली आहे. त्यामुळे महिलांमध्ये संताप व्यक्त होत आहे.