Agriculture Production : देशात फलोत्पादन, अन्नधान्यात विक्रमी वाढ

Latest Agriculture News : देशात अन्नधान्याबरोबरच फलोत्पादनात विक्रमी वाढ झाली आहे. २०२२-२३ मध्ये विविध फलोत्पादन पिकांचे एकूण ३५१.९२ दशलक्ष टन (१.३७ टक्के वाढ) उत्पादन झाल्याची माहिती केंद्रीय कृषी आणि शेतकरी कल्याण मंत्रालयाने आपल्या दुसऱ्या आगाऊ अंदाजात दिली आहे.

२०२२-२३मधील चांगल्या मॉन्सून हंगामानंतर अन्नधान्य आणि फलोत्पादन पिके नवा विक्रम स्थापित करणार आहेत. अन्नधान्य ३३० दशलक्ष, तर फलोत्पादन ३५२ दशलक्ष टनापर्यंत पोचणार आहे.

फलोत्पादनात २०२२-२३ यावर्षी सुमारे ४.७४ दशलक्ष टन (१.३७ टक्के) वाढ होऊन ते विक्रमी ३५१.९२ दशलक्ष टनापर्यंत पोचणार असल्याचे केंद्रीय कृषी विभागाच्या माहितीतून समोर आले आहे. यात फळे, भाजीपाला, लागवड पिके, फळभाज्या, फुले, मध यांच्या उत्पादनात वाढीची अपेक्षा आहे.

यावर्षात १०८.३४ दशलक्ष टन फळ उत्पादन अपेक्षित आहे. २०२१-२२मध्ये हेच उत्पादन १०७.५१ दशलक्ष टन होते. २०२१-२२ मधील २०९.१४ दशलक्ष टनांच्या तुलनेत २०२२-२३ मध्ये भाजीपाल्याचे उत्पादन २१२.९१ दशलक्ष टन होण्याचा अंदाज आहे.

बहुवार्षिक पीक लागवडीखालील (ऊस, चहा, कॉफी आदी) पिकांचे उत्पादन २०२१-२२ मध्ये १५.७६ दशलक्ष टना वरून २०२२-२३ मध्ये १६.०५ दशलक्ष टन पर्यंत वाढण्याचा अंदाज आहे, यात सुमारे १.७८ टक्के वाढ असेल. तसेच बटाट्याचे उत्पादन २०२१-२२च्या ५६.१८ दशलक्ष टनाच्या तुलनेत २०२२-२३मध्ये ६०.५४ दशलक्ष टन अपेक्षित आहे.

अन्नधान्य उत्पादनात २०२१-२२च्या तुलनेत २०२२-२३ यावर्षी सुमारे १४ दशलक्ष टन उत्पादन वाढीचा (४ टक्क्यांवर) अंदाज कृषी विभागाच्या अंतिम अंदाजात व्यक्त करण्यात आला आहे.

तर गेल्यावर्षीच्या तुलनेत फलोत्पादन ५ दशलक्ष टन वाढेल (१ टक्क्यांवर) असे मंत्रालयाच्या दुसऱ्या आगाऊ अंदाजात म्हटले आहे. अन्नधान्य बास्केटमध्ये २०२२-२३ यावर्षात भात, गहू यांचे (जुलै ते जून चक्रीवर्ष) अनुक्रमे १३५ दशलक्ष टन आणि ११० दशलक्ष टन उत्पादन नोंदले गेले आहे.