Raju Shetti : 'गनिमी काव्याने महामार्गावर या, लुंग्या सुंग्याना थारा देऊ नका', राजू शेट्टींचे शेतकऱ्यांना आवाहन

Raju Shetti vs Sugarcane Factory Owners : ऊस दरावरून निर्माण झालेली कोंडी फोडण्यासाठी काल मुंबईत सहकारमंत्री दिलीप वळसे-पाटील यांच्या अध्यक्षतेखाली झालेली बैठकही निष्फळ ठरली. मागील हंगामातील गाळप झालेल्या उसाला चारशेऐवजी किमान १०० रुपये मिळालेच पाहिजेत, यावर 'स्वाभिमानी'चे नेते राजू शेट्टी ठाम राहिल्याने पेच वाढला. त्यामुळे आज, गुरुवारी सकाळी १० वाजता राष्ट्रीय महामार्ग रोको आंदोलन करण्यात येत आहे.

दरम्यान कोल्हापूर जिल्ह्यातील शिरोली पुलावर स्वाभिमानी शेतकरी संघटनेच्या आंदोलनाचा धसका घेऊन कोल्हापूर पोलीस प्रशासनाने मोठा पोलीस बंदोबस्त तैनात केला आहे. तर आंदोलनाच्या पार्श्वभूमीवर शिरोळ आणि जयसिंगपूर मधील स्वाभिमानी शेतकरी संघटनेच्या कार्यकर्त्यांना मध्यरात्रीपासून ताब्यात घेण्यास सुरुवात केली आहे. कोणत्याही परिस्थितीत कायदा आणि सुव्यवस्थेचा प्रश्न निर्माण होऊ नये, यासाठी पोलीस प्रशासनाने ५०० पेक्षा अधिक पोलीस, अग्निशमनचे बंब आंदोलन स्थळी तैनात केले आहेत.

यावेळी माजी खासदार राजू शेट्टी यांनी मागील हंगामातील चारशे रुपये मागत होतो, आम्ही तीन पावले मागे आलो आहोत. दोनशेवरून शंभर रुपये दिले तरी चालतील; पण, ते दिलेच पाहिजेत. काही कारखाने देण्यास तयार आहेत; पण, सरकार त्यात आडकाठी आणत होते. आता हे पैसे दिले तर आयुक्त त्यांना मान्यता देतील, असे सहकारमंत्र्यांनीच सांगितल्याने कारखान्यांनी तसे जाहीर करावे असे आवाहन केले आहे.

यावेळी माजी खासदार राजू शेट्टी यांनी शेतकऱ्यांना आवाहन करत म्हणाले की, पुणे, बेंगलोर राष्ट्रीय महामार्ग रोखण्यासाठी मी निघालो आहे. कोल्हापुरात जाऊन अंबाबाईचे दर्शन घेऊन माझ्या शेतकऱ्यांना हक्क मिळवून द्या असं साकडे घालणार आहे.

यानंतर मी महामार्गावर जाऊन बसणार आहे माझ्या बऱ्याच सहकार्यांना रात्री पोलिसांनी ताब्यात घेतलेला आहे. पण मी पोलिसांना चुकवून महामार्गावर जाणार आहे. जे शेतकरी मागे राहणार आहेत त्या शेतकऱ्यांना माझी विनंती आहे आम्ही जोपर्यंत रस्त्यावर आहे तोपर्यंत साखर कारखाने चालू करू देऊ नयेत.

कारखानदार तुमच्या उसाची त्यांना लचके तोडणार आहेत परंतु कारखानदारांना मागच्या वर्षाचे आणि यंदाचे जादा पैसे द्यायचे नाहीत तसेच त्यांना शेतकऱ्यांची चळवळ मोडीत काढायची आहे. यामुळे हातात बुडखा घेऊन तुमचा ऊस सांभाळत बसा असे आवाहन माजी खासदार राजू शेट्टी यांनी केले.