Pune News: महात्मा फुले कृषी विद्यापीठाच्या प्रभारी कुलसचिवाच्या कामकाजावरून वाद झाल्यामुळे राज्य शासनाने आता उपजिल्हाधिकारी राजेंद्रकुमार पाटील यांच्याकडे कुलसचिवपदाची पूर्णवेळ सूत्रे दिली आहेत.
राज्यातील कृषी विद्यापीठांच्या प्रभारी कुलसचिवपदाची समस्या काही महिन्यांपासून सुटलेली नाही. राहुरीतील महात्मा फुले विद्यापीठाचे कुलसचिवपद सहयोगी प्राध्यापक डॉ.नितीन दानवले यांना, अकोला येथील डॉ. पंजाबराव देशमुख कृषी विद्यापीठात सहयोगी प्राध्यापक सतीश ठाकरे यांना, तर दापोलीच्या डॉ. बाळासाहेब सावंत कोकण कृषी विद्यापीठाचे कुलसचिवपद डॉ. पी. सी. हळदवणेकर यांच्या गळ्यात मारण्यात आले होते. विद्यापीठाचे प्रशासन आपल्या सोईप्रमाणे काहीही निर्णय घेतात. त्यामुळे शासनाचा अंकुश राहण्यासाठी कुलसचिवपदावर थेट राज्य शासनाकडून नेमणूक केली जाते. तशी तरतूददेखील कायद्यात आहे.
शासकीय अधिकारी नेमण्याचा प्रस्ताव
शासनाने कुलसचिवांच्या नेमणुकांकडे सपशेल दुर्लक्ष केले आहे. त्यामुळे विद्यापीठांचे फावले आहे. सरकारी गोंधळाचा फायदा घेत बहुतेक विद्यापीठांनी मर्जीतील अधिकाऱ्यांकडे कुलसचिवपदाची प्रभारी सूत्रे दिली. त्यातच राहुरी विद्यापीठातील डॉ. दानवले यांच्या विरोधात शेतकरी बाळासाहेब जाधव यांनी महाराष्ट्र कृषी शिक्षण व संशोधन परिषदेकडे तक्रार केली होती. कुलसचिवपदाचा अतिरिक्त कार्यभार देताना सेवाज्येष्ठता डावलण्यात आली.
डॉ. दानवले यांनी घेतलेल्या निर्णयाची चौकशी करावी तसेच विद्यापीठ कायद्यातील तरतुदीनुसार पूर्णवेळ कुलसचिव नियुक्त करावा, असे तक्रारीत नमूद करण्यात आले होते. त्यामुळे प्रभारी पद्धतीचे कामकाज योग्यप्रकारे चालत नसल्याचे जाणीव होताच कृषी परिषदेने एक प्रस्ताव कृषी खात्याला पाठवला. त्यात सर्व विद्यापीठांमध्ये उपजिल्हाधिकारी दर्जाचे कुलसचिव नियुक्त करण्याचा आग्रह धरला होता.
दोन विद्यापीठांमधील समस्या कायम
सूत्रांच्या म्हणण्यानुसार, कृषी परिषदेने यापूर्वी शासनाला पाठवलेल्या प्रस्तावात, ‘सध्या विद्यापीठांचा कारभार प्रभारी कुलसचिवांकडे आहे. मात्र हे पद महाराष्ट्र कृषी विद्यापीठे कायदा १९८३ मधील कलम १९(९) नुसार शासनाकडून भरले जाते. विद्यापीठांचे कामकाज योग्य पद्धतीने चालण्यासाठी शासनाचे प्रतिनिधी म्हणून कुलसचिवपदावर शासनाचा अधिकारी नियुक्त करणे अत्यावश्यक आहे,’ नमूद केले होते.
राहुरीच्या प्रभारी कुलसचिवपदाची तक्रार कृषी परिषदेने आता निकालात काढली आहे. या पदावर उपजिल्हाधिकारी राजेंद्रकुमार पाटील यांची प्रतिनियुक्तीने नेमणूक झाली असल्याचे परिषदेने नमूद केले आहे. मात्र परिदषदेने अन्य दोन विद्यापीठांच्या प्रभारी कुलसचिवपदाबाबत काहीही स्पष्ट केलेले नाही.
‘प्रभारी कालावधीतील चौकशी करा’
राहुरी विद्यापीठाला पूर्णवेळ कुलसचिव नियुक्त होण्यासाठी धडपड करणारे शेतकरी बाळासाहेब जाधव यांनी पूर्णवेळ नियुक्तीबद्दल समाधान व्यक्त केले आहे. परंतु आधीच्या प्रभारी कुलसचिवाच्या काळातील कामकाजाची चौकशी करण्याबाबत शासनाने काहीही स्पष्ट केले नसल्याबद्दल त्यांनी नाराजी व्यक्त केली. दानवले यांच्या कालावधीत झालेल्या कामकाजाच्या चौकशीसाठी आपण पाठपुरावा करणार आहोत, असे त्यांनी सांगितले.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.