Nanded Rain: नांदेडला पावसामुळे खरिपाला जीवदान

Nanded News: जिल्ह्यात सोमवारी दुपारनंतर झालेल्या पावसामुळे खरीप पिकाला जीवदान मिळाले आहे. अनेक भागात मागील पंधरा ते वीस दिवसांपासून पाऊस नव्हता. परंतु दोन दिवसांपासून होत असलेल्या पावसामुळे शेतकरी सुखावले आहेत. सोमवारी सरासरी १७.४० मिलिमीटर पाऊस झाला. तर, मुदखेड आणि मालेगाव या दोन मंडलांत अतिवृष्टीची नोंद झाली आहे. 

नांदेड जिल्ह्यात खरिपाची पेरणी झाल्यानंतर समाधानकारक पाऊस झाला. पिकांची वाढही चांगली झाली. यामुळे शेतकऱ्यांनी अंतर मशागतीचे कामे आटोपून घेतली. परंतु मागील पंधरा ते वीस दिवसांपासून पावसाने पाठ फिरवल्यामुळे खरिपातील पिके धोक्यात आली होती. 

अनेक ठिकाणी कापूस सोयाबीन तूर, उडीद, मूग या पिकांची वाढ खुंटल्यामुळे शेतकऱ्यांच्या आभाळाकडे नजरा लागल्या होत्या. भारतीय हवामान खात्याने नांदेड जिल्ह्यात अतिवृष्टीचा इशारा दिला होता. परंतु पाऊस भाग बदलून काही ठरावीक भागात होत होता.

यानंतर मागील दोन दिवसांपासून मात्र जिल्ह्याच्या काही भागांत पाऊस सुरू झाला. रविवारी तसेच सोमवारी झालेल्या पावसामुळे खरीप पिकांना जीवदान मिळाले. हा पाऊस सर्वच तालुक्यासह विशेषतः नांदेड, अर्धापूर, मुदखेड, किनवट, माहूर या तालुक्यांत चांगला झाला.

सोमवारचा पाऊस मुदखेड तालुक्यात ७२ मिलिमीटर तसेच अर्धापूर तालुक्यातील मालेगाव मंडलात ८४ मिलिमीटर झाल्यामुळे या भागात अतिवृष्टीची नोंद झाली. जिल्ह्यात २४ तासांत सरासरी १७.४० मिलिमीटर पावसाची नोंद झाल्याची माहिती जिल्हाधिकारी कार्यालयातून मिळाली.