Parbhani Water Crisis : परभणी जिल्ह्यातील नऊ लघू प्रकल्पांमध्ये शून्य टक्के साठा

Parbhani News : पाणलोटात झालेल्या पावसामुळे जिंतूर तालुक्यातील करपरा मध्यम प्रकल्पातील पाणीसाठ्यात वाढ तर पावसाअभावी गंगाखेड तालुक्यातील मासोळी मध्यम प्रकल्पातील पाणीसाठ्यात घट झाली आहे.

सोमवारी (ता.२१) करपरा मध्यम प्रकल्पाच्या जलाशयात ५.१५० दलघमीनुसार २१ टक्के तर मासोळी मध्यम प्रकल्पाच्या जलाशयात ४.५३४ दलघमीनुसार १६.७१ टक्के पाणीसाठा होता. जिल्ह्यातील ९ लघू तलावात शून्य टक्के तर १३ तलावत उपयुक्त पाणीसाठा होता.

करपरा मध्यम प्रकल्पाची पूर्ण जल क्षमता २८.८२० दलमघी असून त्यापैकी उपयुक्त साठा क्षमता २४.९०० दलघमी आहे.मासोळी मध्यम प्रकल्पाची पूर्ण जल क्षमता ३४.०८५ दलघमी असून त्यापैकी उपयुक्त साठा २७.१४१ दलघमी आहे. गुरुवारी (ता.१०) घेतलेल्या नोंदीनुसार करपरा प्रकल्पात १.७९८ दलघमीनुसार ७ टक्के तर मासोळी मध्यम प्रकल्पांमध्ये ५.६१३ दलघमीनुसार १९ टक्के उपयुक्त पाणीसाठा होता.

गुरुवारी (ता.१७) पाणलोटात पावसामुळे करपरा मध्यम प्रकल्पाच्या जलशयात पाण्याचा येवा झाल्यामुळे १४ टक्क्यांनी वाढ होऊन सोमवारी करपरा मध्यम प्रकल्पात ५.१५ दलघमीनुसार २१ टक्के साठा जमा झाला. पावसाअभावी मासोळी मध्यम प्रकल्पांतील जलाशयातील साठ्यात घट होऊन सोमवारी ४.५३४ दलघमीनुसार १६.७१ टक्के पाणीसाठा होता.२०२४ मध्ये १७ जुलै रोजी करपरा मध्यम प्रकल्पामध्ये १६ टक्के तर मासोळी मध्यम प्रकल्पामध्ये २ टक्के पाणीसाठा होता.

जिल्ह्यातील १३ तलावांत उपयुक्त पाणीसाठा जमा झाला आहे. त्यात जिंतूर तालुक्यातील वडाळी लघू तलावात १०.३३ टक्के,केहाळ लघू तलावात ०.०६ टक्के, बेलखेडा लघू तलावात ३.१५ टक्के,चारठाणा लघु तलावात २.९४ टक्के, मांडवी लघू तलावात ७.३१ टक्के,जोगवाडा लघू तलावात ६२.४९ टक्के, दहेगाव लघू तलावात ०.१९ टक्के, भोसी लघू तलावात ८.७ टक्के, पाथरी तालुक्यातील झरी लघू तलावात ६२.९६ टक्के,गंगाखेड तालुक्यातील राणीसावरगाव लघू तलावात १०.१६ टक्के, पिंपळदरी लघू तलावात ४४.८३ टक्के, पालम तालुक्यातील तांदुळवाडी लघू तलावामध्ये ७.८२ टक्के पाणीसाठा, पाडळी तलावात ११ टक्के पाणीसाठा होता.

नऊ लघू तलावात शून्य टक्के पाणीसाठा

पाणलोट क्षेत्रात अत्यंत कमी पाऊस असल्यामुळे जिल्ह्यातील ९ लघू तलावामध्ये शून्य टक्के उपयुक्त पाणीसाठा आहे त्यात परभणी तालुक्याील पेडगाव,जिंतूर तालुक्यातील आडगाव , चिंचोली, देवगाव,कवडा, मानवत तालुक्यातील आंबेगाव,सोनपेठ तालुक्यातील नखातवाडी, गंगाखेड तालुक्यातील कोद्री, टाकळवाडी लघू तलावांचा समावेश आहे.