Water for Wildlife : वन्यप्राण्यांसाठी पाणवठ्यांची सोय

Baramati News: उन्हाची तीव्रता दिवसेंदिवस वाढत चालली असून पाणीटंचाईची समस्याही तीव्र होत आहे. पाण्याचे नैसर्गिक स्रोत आटल्याने दौंड, बारामती वनक्षेत्रामधील वन्यजीवांना पिण्याच्या पाण्यासाठी भटकंती करावी लागत आहे. यातून वन्यप्राणी पाण्याच्या शोधात मानवी वस्त्यांजवळ येत आहेत.

काहीवेळा रस्ते ओलांडताना वन्यप्राण्यांचे अपघात होत आहेत. या पार्श्‍वभूमीवर ‘डेक्कन प्लॅटू वाइल्डलाइफ कंजर्वेशन ट्रस्ट’ या संस्थेने वनविभागाने वन्य प्राण्यांसाठी तयार करण्यात आलेल्या पाणवठ्यांची दुरुस्ती व त्यामध्ये पाणी भरण्याचा उपक्रम हाती घेतला आहे.

वनसंरक्षण व वनवृद्धीसाठी ही संस्था काम करते. संस्थेमार्फत बारामती व दौंड येथील वन विभागातील पाणवठ्यांचे निरीक्षण करून गरज असेल तेथे दुरुस्ती करून दररोज स्वच्छ पाणी उपलब्ध करून देण्यात येत आहे.

या वेळी संस्थेचे अध्यक्ष विराज फरांदे यांनी सांगितले, की वनविभागाकडील उपलब्ध संसाधने व मर्यादांचा विचार करता सेवाभावी संस्थांनी वन संरक्षण तसेच वन्यप्राणी संरक्षणासाठी पुढे आले पाहिजे. वन्य वन्यक्षेत्रातील पाणवठ्यांवर पाणी पुरविण्याबरोबरच त्यांची देखभाल व निगा राखणे हे काम देखील संस्थेमार्फत हाती घेण्यात आले आहे.

उन्हाळा संपेपर्यंत वन्यजीवांना पाण्यासाठी भटकंती करावी लागू नये, यासाठी संस्थेने तयारी करून ठेवली आहे. या कामासाठी वनविभागातील अधिकारी तसेच कर्मचारी यांची साथ मिळत असून संस्थेचे विश्‍वस्त विनोद कबनूरकर, अवधूत कोल्हे, प्रणित साळवे, डॉ. धनंजय भोईटे, विजय कडू, महेश भोईटे आदींचे सहकार्य मिळत आहे. या उपक्रमाचे सर्वत्र कौतुक होत आहे.