Agriculture Electricity : रब्बीसाठी पूर्ण वेळ वीज, रोहित्रे तत्काळ द्या

Buldana News : ‘‘शेतकरी आधीच संकटात आहे. त्यात विजेचा लपंडाव सुरू आहे. त्यामुळे शेतकऱ्यांच्या संकटात अधिकच भर पडली आहे. रब्बीसाठी पूर्ण वेळ वीज द्यावी. तसेच नादुरुस्त रोहित्रे तातडीने बदलून द्यावीत, अन्यथा ‘महावितरण’चे कार्यालय जागेवर ठेवणार नाही,’’ असा इशारा शेतकरी नेते रविकांत तुपकर यांनी दिला आहे.

तुपकर यांची ‘एल्गार रथयात्रा’ सध्या मेहकर-लोणार तालुक्यात आहे. या यात्रेदरम्यान गुरुवारी (ता. ९) आयोजित सभेत तुपकर यांनी ‘महावितरण’ला इशारा दिला.

सोयाबीन-कापूस उत्पादकांच्या मागण्यांसाठी तुपकर यांनी आंदोलन हाती घेतले आहे. त्यानुसार जिल्ह्यात एल्गार रथयात्रा सुरू आहे. यात्रेने मेहकर तालुक्यातील जनुना, विठ्ठलवाडी, पांगरखेड, गोहगाव दांदडे, डोणगाव, खंडाळा, अंत्री देशमुख, चिंचोली बोरे व लोणार तालुक्यातील सुलतानपूर, रांजणी, जांबुल, मांडवा आदी गावांतून प्रवास केला आहे. यात्रेला शेतकरी, शेतमजूर, तरुणांचा प्रतिसाद मिळत आहे.

तुपकर म्हणाले, ‘‘खरीप हंगामात पावसात खंड पडल्याने तसेच पिवळा मोझॅक व गुलाबी बोंड अळीमुळे सोयाबीन-कापसाच्या उत्पन्नात प्रचंड घट झाली आहे. शेतकऱ्यांचा लागवडीचा खर्च देखील निघणे अशक्य आहे. त्यामुळे शेतकऱ्यांना रब्बीपासून थोड्याफार आशा आहेत.

मात्र वीज वितरण कंपनीच्या आडमुठ्या धोरणामुळे खरिपाप्रमाणेच रब्बीतील पिकांचीही नासाडी होण्याची शक्यता आहे. ज्या शेतकऱ्यांकडे थोडेफार पाणी आहे, ते शेतकरी हरभरा, गहू, तूर ही पिके जगविण्याची धडपड करीत आहेत.

परंतु पिकांना पाणी देण्यासाठी विजेची अडचण येत आहे. वीज वितरण कंपनीने नादुरुस्त रोहित्र तातडीने दुरुस्त करून द्यावीत, रब्बीसाठी पूर्ण वेळ वीजपुरवठा द्यावा. वीज वितरण कंपनीने शेतकऱ्यांना वेठीस धरल्यास कंपनीला धडा शिकवू.’’