Coconut Cultivation : नारळ लागवडीतून उत्‍पादन वाढ

Murud News : मुरूड पंचायत समिती कार्यालयाला समुद्रकिनाऱ्यालगत लागवड केलेल्‍या नारळाच्या झाडांपासून दोन ते तीन लाख रुपयांचे त्रैवार्षिक उत्पन्न मिळत आहे. या परिसरात यंदा सुधारित जातीच्या माडाची रोपे लावल्याने पुढील चार वर्षांत उत्पन्नात निश्चित वाढ होईल, असा विश्वास मुरूड पंचायत समितीचे गटविकास अधिकारी राजेंद्र कुमार खताळ यांनी व्यक्त केला.

मुरूड पंचायत समितीसह दरबार हॉल, ग्रामीण रुग्णालय, प्राथमिक आरोग्य केंद्र निवासस्थान, जिल्हा परिषद विश्रामगृह, पशुधन विकास अधिकारी कार्यालये समुद्रालगत आहेत. जवळपास पाच एकर जागेत १०० हून अधिक नारळाची झाडे लावण्यात आली असून ८० ते ९० फूट उंचीची ही झाडे वर्षानुवर्षे फळे देतात.

त्रैवार्षिक लिलावातून सरकारला माडाच्या झाडांपासून दोन लाख ९७ हजार रुपये इतके उत्पन्न मिळत आहे. लिलाव पद्धतीत शहाळीविक्रेते बोली बोलतात. जो जास्तीत जास्त बोली लावेल, त्यांना लिलाव दिला जातो. प्रत्‍येक सरकारी कार्यालयाच्या आवारात नारळासारखी उत्पन्न देणारी झाडे लावली, तर तिजोरीत निश्‍चितच भर पडेल.

शिवाय पर्यावरणाचा समतोलही राखला जाईल, असे पर्यावरणप्रेमींचे म्‍हणणे आहे. यंदा माझी वसुंधरा अभियानांतर्गत परिसरात स्वच्छता अभियान राबविण्यात आले असून दरबार हॉल व पंचायत समिती कार्यालयासमोर सुधारित प्रजातीच्या नारळाच्या झाडांची लागवड करण्यात आली. या झाडांपासून तीन-चार वर्षांत उत्पन्न मिळणे अपेक्षित आहे. लागवड केलेल्‍या झाडाची निगा राखण्याची जबाबदारी त्‍या त्‍या कार्यालयातील कर्मचाऱ्यांकडे देण्यात आली आहे.

सुधारित वाणाचा अवलंब

मुरूड हे पर्यटन केंद्र असल्‍याने शेती, फळ लागवडीवर भर देणे आवश्‍यक आहे. योग्य प्रमाणात खत-पाणी दिल्याशिवाय चांगली फळधारणा होत नाही. पारंपरिक वाणापेक्षा शेतकऱ्यांनी सुधारित वाणांचा अवलंब करावा, असे आवाहन कृषी विभागाकडून करण्यात येत आहे.