Malani Adchani Ani Upay: मळणी करताना येणाऱ्या अडचणी आणि त्यावरील उपाय

Thresher Machine Maintenance: राज्यात सध्या अनेक भागांत पिकांची मळणी सुरू आहे. पारंपरिक पद्धतीऐवजी आता शेतकरी मोठ्या प्रमाणावर कंम्बाईन हार्वेस्टर आणि मळणी यंत्रांचा वापर करत आहेत. मात्र, मळणी करताना काही सामान्य अडचणी येतात. जसं दाणे व्यवस्थित वेगळं न होणं, दाणे तुटणं, धान्य भुश्याबरोबर उडणं, मळणी ड्रम जाम होणं. या अडचणींमुळं धान्याचे नुकसान होते. ते टाळण्यासाठी सोप्या आणि योग्य उपाययोजना केल्यास या समस्या सहज टाळता येतात.

दाणे व्यवस्थित वेगळे न होणे-

मळणी करताना अनेकदा दाणे व्यवस्थित वेगळे होत नाहीत. अशावेळी सिलेंडरचा वेग थोडा वाढवावा आणि मळणी यंत्रातील ड्रम व सिलेंडरमधील अंतर कमी ठेवावे. तसेच ओले पीक मळणीसाठी टाकणे टाळावे. यामुळे मळणी व्यवस्थित होते.

दाणे तुटणे-

कधी कधी दाणे तुटण्याचे प्रमाण वाढते. याचे मुख्य कारण म्हणजे जास्त प्रमाणात पीक एकदम टाकणे. त्यामुळे मळणी यंत्रात पीक हळूहळू आणि समप्रमाणात टाकावे. तसेच ओल्या पिकाची मळणी टाळल्यास दाणे तुटण्याचे प्रमाण कमी होते.

धान्य भुश्याबरोबर उडणे-

धान्य भुश्याबरोबर उडून जाण्याची समस्या देखील दिसून येते. अशावेळी पंख्याची गती कमी करावी. उलट, जर धान्यामध्ये भुसा जास्त प्रमाणात राहात असेल तर पंख्याची गती वाढवावी. यासोबत चाळणी हलवणाऱ्या यंत्राची गती वाढवावी आणि पिकानुसार योग्य आकाराच्या चाळण्या वापराव्यात.

चाळणीवर दाण्याचे प्रमाण वाढणे-

कधी कधी वरच्या चाळणीवर दाणे साचतात. अशावेळी चाळणीची छिद्रे बंद झाली आहेत का ते तपासून साफ करावी. तसेच चाळणीचा उतार कमी करावा आणि योग्य आकाराच्या चाळण्या वापराव्यात.

मळणी ड्रम जाम होणे-

मळणी करताना ड्रम जाम होणे ही मोठी समस्या असू शकते. यासाठी एकदम जास्त पीक टाकणं टाळावे. यंत्रातील बेल्टचा ताण योग्य आहे का ते तपासावे. सिलेंडरचा वेग योग्य ठेवावा आणि शक्यतो कोरड्या पिकाचीच मळणी करावी. पिकात गवत किंवा इतर कचरा असल्यास तो आधी काढून टाकावा. तसेच सिलेंडर आणि ड्रममधील अंतर योग्य ठेवणेही गरजेचे आहे.