Crop Loan : नांदेडला पीककर्ज वाटपात नऊ खासगी बँका शून्यावर

Nanded News : जिल्ह्यात खरीप हंगाम २०२५-२६ साठी १८५० कोटी रुपयांचे पीककर्ज वाटपाचे उद्दिष्ट प्रशासनाने विविध बँकांना दिले आहे. असे असताना जिल्ह्यात खासगी क्षेत्रातील १२ बँकांपेकी नऊ शाखेतून कर्जवाटप शून्य टक्के आहे. तर राष्ट्रीयीकृत बँकांनी आजपर्यंत १९ टक्के, जिल्हा बँकेने ३० टक्के, तर महाराष्ट्र ग्रामीण बँकेने ४३ टक्के पीककर्ज वाटप करून आघाडी घेतल्याची माहिती जिल्हा उपनिबंधक (सहकारी संस्था) कार्यालयाकडून मिळाली.

जिल्हास्तरीय बँकर्स कमिटीच्या बैठकीत जिल्हाधिकारी राहुल कर्डिले यांनी आगामी खरीप हंगामात नांदेड जिल्ह्यासाठी १८४९.७७ कोटी, तर रब्बीसाठी ६८३.२१ कोटी असे एकूण दोन हजार ५३२ कोटींचे पीककर्ज वाटपाचे उद्दिष्ट २८ बँकांच्या वेगवेगळ्या शाखांना दिले आहे.

या बाबत जिल्हाधिकारी राहुल कर्डिले यांनी शेतकऱ्यांना वेळेत कर्ज देण्याचे निर्देश दिले आहेत. पीककर्ज वेळेवर उपलब्ध व्हावे, यासाठी जिल्हा अग्रणी बँकेचे व्यवस्थापक श्री सोनकांबळे यांनी सर्वच बँकर्सना वेळोवेळी सूचना दिल्या. परंतु राष्ट्रीयीकृत बँका

तसेच खासगी क्षेतातील बँकांनी अद्याप पीककर्ज वाटपाला गती दिली नाही. जिल्ह्यात खासगी क्षेत्रातील १२ बँकांपेकी ॲक्सिस, एचडीएफसी व आयसीआयसीआय या तीन बँका वगळता डीसीबी, आयएनएफसी, इन्डूसंड बँक, कर्नाटका बँक, कोटक महिंद्रा बँक, यश बँक, सिटी युनियन बँक व आयडीबीआय या बँकेने पीककर्ज वाटपाचे खातेही उघडले नाही.

तर राष्ट्रीयीकृत बँकांनी आजपर्यंत १२८५७ खातेदारांना १९ टक्क्यांनुसार १५७.६७ कोटींचे पीककर्ज वाटप केले आहे. नांदेड जिल्हा मध्यवर्ती सहकारी बँकेने २९ टक्क्यांनुसार १३ हजार ३२६ खातेदारांना १३०.३० कोटी तर महाराष्ट्र ग्रामीण बँकेने ४३ टक्क्यांनुसार १९ हजार २६७ खातेदारांना १८५.७१ कोटींचे पीककर्ज वाटप केले केल्याची माहिती डीडीआर कार्यालयाकडून मिळाली.

वाटपाचे प्रमाण कमी असलेल्या राष्ट्रीयीकृत बँका

जिल्हा प्रशासनाने शेतकऱ्यांना वेळेवर पीककर्ज उपलब्ध व्हावे या करिता सर्वच बँकांना लक्षांक दिले आहे. परंतु काही राष्ट्रीयीकृत बँका मात्र कर्जवाटपाच्या कामाला गती देताना दिसत नाहीत. यात बँक ऑफ इंडिया ७.४२ टक्के, पंजाब नॅशनल बँक २.६२ टक्के, इंडियन ओवरसीज बँक ९ टक्के, कॅनरा बँक ४ टक्के, बँक ऑफ बडोदा ९ टक्के असे पीककर्ज वाटपाचे प्रमाण आहे.