Pre Monsoon Rain: पुण्यात मॉन्सूनपूर्व वादळी पाऊस; शेतकऱ्यांचे मोठे नुकसान

Pune News: पुणे जिल्ह्यात अनेक ठिकाणी जोरदार मॉन्सूनपूर्व पाऊस पडत आहे. वादळी वाऱ्यासह होत असलेल्या पावसामुळे पाणी ओसंडून वाहत आहे. काही ठिकाणी पावसाचा जोरदार दणका देत असल्याने पिकांचे नुकसान होत आहे. शुक्रवारी (ता. १६) दुपारनंतर भोर, मुळशी, मावळ, वेल्हे, हवेली, शिरूर, जुन्नर, आंबेगाव, खेड तालुक्यांत पावसाने चांगलीच हजेरी लावली.

मुळशी तालुक्यात जोरदार झालेल्या अवकाळी पावसामुळे भात खाचरे तुंबली आहेत. त्यामुळे पावसाळापूर्वीची शेतीच्या मशागतीची कामे खोळंबली. तसेच जोरदार वाऱ्यामुळे फळपिकांचे मोठे नुकसान झाले आहे.

शुक्रवारी सकाळपासून ऊन पडले होते. दुपारनंतर अचानक वातावरणात बदल झाला. तर तीन वाजेनंतर ठिकठिकाणी ढग भरून आल्याने जोरदार पावसाला सुरुवात झाली. प्रामुख्याने मुळशी भागात पावसाचा जोर अधिक होता. त्यामुळे भात खाचरे बऱ्यापैकी भरल्याने भात रोपवाटिकेच्या कांमांना वेग येणार असल्याची शक्यता आहे.

भोर, सासवड, जेजुरी, लोणी काळभोर, उरूळीकांचन, वाघोली, शिक्रापूर, तळेगाव दाभाडे, राजगुरूनगर, घोडेगाव, नारायणगाव, चिंचोली अशा अनेक ठिकाणी सायंकाळी चार वाजेच्यादरम्यान पावसाने चांगलीच सुरुवात केली होती.

जोरदार वारे आणि पावसामुळे आंबा, जांभूळ, फणस फळांचे मोठे नुकसान झाले. हापूस, पायरी रायवळ आंब्याची झाडे उंच आहेत. जोरदार वाऱ्यामुळे अशा झाडांवरील फळे मोठ्या प्रमाणावर पडली आहेत. आंबा उतरणी करणे, आढी घालून पिकवणे, मार्केटला पाठवणे पावसामुळे शक्य होणार नाही.