Pre Monsoon Rain: मॉन्सूनपूर्व पावसाचा मराठवाडा, नाशिकमध्ये जोर

Chhatrapati Sambhajinagar News: मराठवाड्यातील छत्रपती संभाजीनगर, जालना, बीड जिल्ह्यांतील अनेक भागांत सोमवारी (ता. १२) दुपारी १२ वाजेनंतर कमी अधिक प्रमाणात अवकाळी पावसाने थैमान घालने सुरू केले होते. सायंकाळपर्यंत हा जोर वेगवेगळ्या भागांत कायम होता.

जालना जिल्ह्यातील अंबड शहरासह परिसरात पावसाच्या हलक्या सरी शहागड परीसरात वादळ झाले. छत्रपती संभाजीनगर जिल्ह्यातील गल्लेबोरगाव येथे विजेच्या कडकडाटासह अवकाळी पाऊस सुरू, आळंद परिसरात दुपारी १२ वाजता वादळी वाऱ्यासह १० मिनिटे धुव्वाधार पाऊस झाला.

टाकळी राजेरायससह परिसरात मध्यम स्वरूपाचा पाऊस झाला. बीड शहर व परिसरात वादळी वाऱ्यासह पाऊस झाला. विजांचा कडकडाटही खूप होता. गेवराई येथे जोरदार वादळी वारे व विजांच्या कडकडाटसह पाऊस झाला.

वडवणीतही पावसाला सुरुवात झाली होती. केज तालुक्यातील काही भागांत पावसाच्या हलक्या सरी झाल्या. शिरूरकासार तालुक्यात काही महसूल मंडलांत जोरदार पाऊस तर कुठे रिमझिम पाऊस झाला. दरम्यान, लातूर, धाराशिवमध्ये सोमवारी पहाटे एकच्या सुमारास अर्धा तास पाऊस झाला. त्यानंतर दिवसभर कडक ऊन होते.

विदर्भात, सातारा, जळगाव जिल्ह्या़ंत ढगाळ वातावरण

अहिल्यानगर जिल्ह्यात सकाळी हलका पाऊस, दुपारनंतर मात्र ढगाळ वातावरण

कोल्हापूर जिल्ह्याच्या पश्चिम भागात दुपारच्या सुमारास पावसाला सुरुवात

परभणी जिल्ह्यात सायंकाळी पाचच्या सुमारास जोरदार पावसाला सुरुवात

सोलापूर भागात ढगाळ वातावरण, काही भागांत पावसाची हजेरी

नाशिकमध्ये सलग आठव्या दिवशी हजेरी

नाशिक : जिल्ह्यात सोमवारी (ता. १२) सलग आठव्या दिवशी विविध भागांत पावसाने हजेरी लावली. यामुळे कांदा उत्पादकांचे नुकसान वाढले असून आंबा, डाळिंब व भाजीपाला उत्पादकही अडचणी सापडले आहेत. नाशिक शहर परिसरासह नाशिक, सटाणा, देवळा, कळवण, मालेगाव व इगतपुरी तालुक्यांत पाऊस झाला.