Solapur News : राज्यातील मॉन्सूनपूर्व पावसामुळे एप्रिल आणि मे या दोन महिन्यात राज्यातील प्रमुख सात जिल्ह्यांमधील एक लाख ५६ हजार ५५ एकरावरील (६२ हजार ४२२ हेक्टर) पिके भुईसपाट झाली आहेत. तर सोलापूर जिल्ह्यातील तीन हजार ७०० हेक्टरवरील पिकांचे नुकसान झाले आहे.
नुकसानीचा अहवाल कृषी विभागाने मागवून घेतला असून शेतकऱ्यांना आता महसूल विभागाच्या पंचनाम्यानंतर भरपाई मिळणार आहे. पण, अजूनही महसूल विभागाकडून सर्व जिल्ह्यांमध्ये नुकसानीचे पंचनामे सुरू झालेले नाहीत.
पंढरपूर, मोहोळ, पंढरपूर, उत्तर सोलापूर, सांगोला, मंगळवेढा तालुक्यात सर्वाधिक नुकसान झाल्याचे कृषी अधीक्षकांनी सांगितले आहे. याशिवाय नाशिक, नगर, अमरावती, बुलडाणा, जालना व चंद्रपूर या सहा जिल्ह्यांमधील ६० हजार हेक्टरवरील पिकांना पावसाचा मोठा फटका बसला आहे.
मार्च, एप्रिल आणि मे अशा तीन महिन्यात शेतकऱ्यांचे मॉन्सूनपूर्व अवकाळी पावसामुळे नुकसान होऊनही अद्याप पंचनामे झालेले नाहीत. आता शेतात पिके नसल्याने पंचनामे करायचे कसे, असा प्रश्न महसूलचे अधिकारी उपस्थित करीत आहेत. त्यामुळे शेतकऱ्यांना नुकसान भरपाई कधीपर्यंत मिळणार, असा प्रश्न उपस्थित होऊ लागला आहे.
पंचनामे झाल्यानंतर शेतकऱ्यांना १ जानेवारी २०२४ च्या शासन निर्णयानुसार भरपाई दिली जाणार आहे. पावसाचा सर्वाधिक फटका फळबागांना बसला आहे. गतवर्षी एप्रिल व मे महिन्यात एक लाख १८ हजार हेक्टरवरील पिकांचे अवकाळीमुळे नुकसान झाले होते.
नुकसान झालेली पिके
मागील १५ दिवसांपासून सुरू असलेल्या मुसळधार पावसामुळे राज्यातील नाशिक, नगर, सोलापूर, अमरावती, बुलडाणा, जालना, चंद्रपूर या सात जिल्ह्यातील ४९ हजार २२८ हेक्टरवरील पिकांना फटका बसला आहे. याशिवाय एप्रिल महिन्यात देखील राज्यातील १६ जिल्ह्यांमधील १३ हजार १९४ हेक्टरवरील पिके बाधित झाली आहेत. त्यात मका, गहू, ज्वारी, कांदा, भुईमूग, भाजीपाला यासह केळी, आंबा, द्राक्ष, डाळिंब अशा फळबागांचेही नुकसान झाल्याचे कृषी विभागाच्या अहवालात नमूद आहे.
तीन महिन्यांतील नुकसान
मार्च-एप्रिलमधील नुकसान : १३,१९४ हेक्टर
मे महिन्यातील नुकसान : ४९,२२८ हेक्टर
नुकसानीचे एकूण क्षेत्र : ६२,४२२ हेक्टर
अंदाजे बाधित शेतकरी : ९७,०००
भरपाईचे प्रतिहेक्टरी निकष असे...
शेतीचा प्रकार मदतीची रक्कम
जिरायती १३,६०० रुपये
बागायती २७,००० रुपये
बहुवार्षिक ३६,००० रुपये
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
