Crop Damage Compensation : नुकसानग्रस्त शेतकऱ्यांच्या खात्यावर चार कोटी २३ लाख जमा होणार

Satara News : मॉन्सूनपूर्व पावसामुळे झालेल्या नुकसानीचे पंचनामे पूर्णत्वाकडे असून, आतापर्यंत झालेल्या नुकसानीची भरपाई देण्यास जिल्हा प्रशासनाने सुरुवात केली आहे. पहिल्या टप्प्यात चार कोटी २३ लाखांचे वाटप केले जाणार आहे. यामध्ये शेतकऱ्यांच्या थेट खात्यावर पैसे जमा केले जाणार असून, इतर नुकसानीचे महसूल विभागाकडून ज्या त्या तहसील कार्यालयाकडून पैसे दिले जाणार आहेत.

जिल्ह्यात मे महिन्यात झालेल्या मॉन्सूनपूर्व पावसामुळे मोठ्या प्रमाणात नुकसान झाले होते. यामध्ये शेतीचे २ हजार ४८४ हेक्टर क्षेत्र बाधित झाले होते. याचा सात हजार ६६१ शेतकऱ्यांना फटका बसला होता. सध्या जिल्हा प्रशासनाकडून पंचनामे सुरू असून, शेतीसह इतर नुकसानीचे पंचनामे अंतिम टप्प्यात आले आहेत.

आता शासनाच्या सूचनेनुसार नुकसानग्रस्तांना तातडीने मदतीचे वाटप करण्याचा निर्णय जिल्हा प्रशासनाने घेतला आहे. त्यानुसार जुन्या निकषानुसार मदतीचे वाटप सुरू आहे. अवकाळीत जिल्ह्यातील सात हजार ६६१ शेतकऱ्यांचे नुकसान झाले आहे.

पंचनाम्यानुसार २ हजार ४८४ हेक्टर क्षेत्राचा समावेश आहे. त्याची नुकसान भरपाईची रक्कम तीन कोटींवर जात आहे. ही रक्कम शेतकऱ्यांच्या खात्यावर जमा केली जाणार आहे. शेत जमीन वाहून जाण्यामुळे १६९ हेक्टर बाधित झाले आहे. त्यापोटी १५ लाखांच्या भरपाईचे वाटप होणार आहे.

घरांचे नुकसान

मुसळधार पावसात घरांची मोठ्या प्रमाणात पडझड झाली होती. यामध्ये १४ संपूर्ण घरे पडली आहेत, तर १ हजार ९६९ घरांचे अंशत: नुकसान झाले आहे. त्यापोटी एक कोटी रुपयांच्या मदतीचे वितरण होणार आहे. ही मदत महसूल विभागाकडून दिली जाणार आहे, तसेच पशुधनामध्ये लहान ३४ जनावरे, मोठी १८ जनावरे दगावली. त्यांना एकूण आठ लाख रुपयांचे वाटप भरपाई पोटी केले जाणार आहे. शेतकऱ्यांची नोंदणी असेल त्यांनाच भरपाई ऑनलाइन मिळणार आहे.

जुन्या निकषाप्रमाणे वितरण

शासनाकडून पावसामुळे नुकसानीपोटी दिली जाणारी भरपाई ही जुन्या निकषाप्रमाणे आहे. त्यामुळे दोन व तीन हेक्टर जमिनीला भरपाई मिळणार आहे. या निकषात बदल करावेत आणि हेक्टरी ५० हजारांची भरपाई द्यावी, अशी मागणी विरोधी पक्षांच्या आमदारांकडून होत आहे. मात्र, शासनाने जुन्या निकषाप्रमाणेच वितरण सुरू केले आहे. आता हा मुद्दा आगामी पावसाळी अधिवेशन वादाचा ठरण्याची शक्यता आहे.