Crop Damage Estimate : १७ हजार ६४४ हेक्टरवरील पिकांच्या नुकसानीचा अंदाज

Chh. Sambhajinagar News : मॉन्सून आणि मॉन्सूनपूर्व पावसाने मराठवाड्यात शेतीचे मोठ नुकसान केले. १ मे ते ११ जूनपर्यंत तब्बल १७ हजार ६४४ हेक्टर क्षेत्रावरील पिकांचे नुकसान झाल्याचा प्राथमिक अंदाज आहे. यामध्ये मे मध्ये झालेल्या पावसाने नुकसान झालेल्या तब्बल १२,७१२ हेक्टर क्षेत्राचा समावेश आहे.

मराठवाड्यातील तब्बल २७ हजार १०३ शेतकऱ्यांना नुकसानीची झळ बसली आहे. मॉन्सूनपूर्व पावसाने यंदा चांगलाच कहर केला. गेल्या अनेक वर्षांत असा पाऊस पडला नसल्याचे शेतकरी सांगतात. प्रशासनाच्या माहितीनुसार संपूर्ण मे महिना व ११ जूनपर्यंत मराठवाड्यातील आठही जिल्ह्यांतील १ हजार २२७ गावांमधील तब्बल १७ हजार ६४४ हेक्टर क्षेत्रावरील पिकांचे नुकसान झाले.

यामध्ये १० हजार २२७ हेक्टरमधील बागायती, ५६५ हेक्टरमधील जिरायत क्षेत्रातील तर ६,८५१ हेक्टरमधील फळपिकांच्या झालेल्या नुकसानीचा समावेश आहे. महसूल विभागाच्या माहितीनुसार मे महिन्यात १,०४७ गावातील १९,८५२ शेतकऱ्यांची पिके बाधित झाली. त्यामध्ये १२ हजार ७१२ हेक्टर क्षेत्रावरील नुकसानीचा समावेश आहे.

यापैकी १९७५ हेक्टर फळपीक, १० हजार १७६ हेक्टर बागायती तर ५५९ हेक्टरवरील जिरायत क्षेत्रातील पिकांच्या झालेल्या नुकसानीचा समावेश आहे. जूनमध्ये आतापर्यंत १८० गावांतील ७,२५१ शेतकऱ्यांच्या ४,९३२.०४ हेक्टरवरील पिकांचे नुकसान झाले आहे. यामध्ये ४,८७५ हेक्टर फळपिकांचे, ५१ हेक्टर बागायती तर ५.८२ हेक्टरवरील बाधित क्षेत्राचा समावेश असल्याची माहिती महसूल विभागाच्या सूत्रांनी दिली.

६१३ पशुधन दगावले

माहितीनूसार मे पासून आतापर्यंत मराठवाडा विभागात ६१३ पशुधन दगावले आहे. यामध्ये १५५ लहान दुभती तर ३०१ मोठ्या दुभत्या पशुधनाचा समावेश आहे. तसेच ३१ लहान व १२६ मोठे ओढकाम करणारे पशुधनही नैसर्गिक आपत्तीत दगावले आहे.

३८ जणांचा मृत्यू

१ मे पासून आजपर्यंत वीज पडून, भिंत पडून अशा विविध घटनांत मराठवाड्यात ३८ जणांचा मृत्यू झाला. तसेच ५१ जण जखमी झाले आहेत. गेल्या महिन्यात छत्रपती संभाजीनगर जिल्ह्यात ५ जणांचा मृत्यू झाला. जालना ७, परभणी, हिंगोली प्रत्येकी २, बीड ५, लातूर सहा, धाराशिव आणि नांदेड जिल्ह्यात १० जणांचा मृत्यू झाल्याचे अहवालात म्हटले आहे.