Plastic Flower Ban : प्लॅस्टिक फूल विक्रीवर शासनाने बंदी घालावी

Pune News : राज्यात प्लॅस्टिक फुलामुळे नैसर्गिक पद्धतीने उत्पादन करणाऱ्या फूल उत्पादकांचे मोठे नुकसान होत आहे. त्यामुळे राज्य शासनाने प्लॅस्टिक फूल विक्री वर बंदी घालावी, अशी मागणी राज्याचे कृषी आयुक्त सुरज मांढरे यांच्याकडे पुणे जिल्हा फूल उत्पादक शेतकरी संघाच्यवतीने करण्यात आली आहे.

पुणे जिल्हा फूल उत्पादक शेतकरी संघाच्या वतीने जिल्हाध्यक्ष कृषी भूषण महादेव शेंडकर, उपाध्यक्ष दत्तात्रय कटके, आदिनाथ काळे, अप्पासाहेब शेवाळे, सुनील गोवेकर, प्रमोद टिळेकर इत्यादी शिष्टमंडळातील प्रतिनिधींनी पुणे कृषी आयुक्त सुरज मांढरे यांची भेट घेऊन प्लॅस्टिक फूल विक्रीवर बंदी घालण्यासंदर्भात नुकतेच (ता.११) निवेदन दिले.

या निवेदनात म्हटले आहे की, महाराष्ट्रामध्ये मोठ्या प्रमाणात ओपन शेती, पॉलिहाऊस, शेड नेट हाऊस इत्यादी मध्ये विविध प्रकारची फूल शेती केली जाते. शेतकऱ्यांनी कर्ज काढून पॉलिहाऊस शेडनेटमध्ये फूल शेती केली असून सध्या बाजारात मोठ्या प्रमाणात प्लॅस्टिक चायना फुलांची आवक होत आहे.

ही प्लॅस्टिकची फुलं स्वस्तात उपलब्ध होत असल्यामुळे अनेक डेकोरेटर याच फुलांचा वापर करत असल्यामुळे शेतकऱ्यांनी उत्पादित केलेल्या फुलांना अजिबात बाजार भाव मिळत नाही. त्यामुळे शेतकऱ्यांचे मोठ्या प्रमाणावर आर्थिक नुकसान होत असल्याने महाराष्ट्रातील शेतकरी वाचवण्यासाठी शासनाने तत्काळ प्लॅस्टिक फुलाच्या विक्रीवर बंदी घालावी.

या विषयासंदर्भात पावसाळी अधिवेशनामध्ये महाराष्ट्रातील अनेक आमदारांनी प्रश्न उपस्थित केला आहे. महाराष्ट्रातील प्रत्येक जिल्ह्यातील शेतकऱ्यांनी एकत्र येऊन प्लॅस्टिक फूल विक्री वरती बंदी घालण्या संदर्भात जिल्हाधिकारी, कृषी आयुक्त यांना निवेदने दिले आहेत. शासनाने शेतकऱ्यांच्या मागणीचा सहानुभूतीने विचार करून प्लॅस्टिक फूल विक्रीवर बंदी घालून शेतकऱ्यांना दिलासा द्यावा अशी मागणी शेतकऱ्यांनी केली आहे.