MGNREGA : कुशल, अकुशल थकलेल्या कामाचे पैसे लाभार्थ्यांच्या खात्यात जमा होणार

Chh. Sambhajinagar News : रोजगार हमी योजनेच्या विविध विकासकामांचे कुशल व अकुशल कामांचे पैसे थकले होते. आता अकुशल कामांचे पैसे जमा होण्यास सुरवात झाली असून लवकरच कुशल कामांचे पैसे ही लाभार्थ्यांच्या बँक खात्यात जमा होणार, असल्याची माहिती रोजगार हमी व फलोत्पादन मंत्री भरत गोगावले यांनी दिली.

पैठण तालुक्यातील देवगाव येथे रोजगार हमी योजनेअंतर्गत झालेल्या विविध विकासकामाचा पीक पाहणी दौरा बुधवारी (ता. २३) सायंकाळी करून श्री. गोगावले यांनी शेतकऱ्यांच्या थेट बांधावर जात त्यांच्याशी संवाद साधला. यावेळी खासदार संदीपान भुमरे, आमदार विलास भुमरे, जिल्हाप्रमुख रमेश पवार, उपजिल्हाप्रमुख विनोद बोंबले, महिला आघाडी तालुका प्रमुख ज्योती पठाडे, पैठण मार्केट कमिटीचे माजी सभापती विलास गोरे, अक्षय जायभाये यांची प्रमुख उपस्थिती होती.

श्री. गोगावले म्हणाले, की तुती व महोगणी पीक लागवडीमुळे सुजलाम् सुफलाम् झालेल्या देवगावचे नाव राज्यात यापुढे रोजगार हमी योजनेच्या विकासाचे मॉडेल गाव म्हणून ओळखले जाईल. बुधवारी आपतगाव, चित्तेपिंपळगाव, पिंप्रीराजा, आडगाव ठोंबरे, कोळघर, देवगाव या भागाचा दौरा करून गोगावले यांनी शेतकऱ्यांच्या थेट बांधावर जाऊन महोगणी, तुती व रेशीम शेतीची तसेच रोजगार हमी योजनेअंतर्गत गावात सुरू असलेल्या व पूर्णत्वास आलेल्या विविध कामांची पाहणी केली.

गावाच्या अंतर्गत रस्त्यांवर टाकण्यात आलेले पेव्हर ब्लॉक्स, सिमेंट काँक्रिट रस्ते तसेच ग्रामीण जीवनमान उंचावण्यासाठी महत्त्वपूर्ण ठरणारे वैयक्तिक लाभाच्या योजनांमधील - गायगोठा, महोगणी लागवड प्रकल्प, सिंचन विहिरी आदी कामांची त्यांनी प्रत्यक्ष पाहणी केली व शेतकऱ्यांच्या समस्या जाणून घेतल्या. मजुरीची रक्कम सोमवार (ता. २१) पासून खात्यावर जमा होण्यास सुरुवात झाली असून, कुशल कामाची बिले शेतकऱ्यांच्या खात्यावर लवकरच जमा होतील.

तत्कालीन रोहयोमंत्री संदीपान भुमरे यांच्या कारकिर्दीत राज्यात मोठ्या प्रमाणात रोजगार हमी योजनांची कामे पूर्ण झाल्याचा उल्लेख त्यांनी केला. देवगाव येथील शेतकरी एकत्रित पुढाकार घेऊन शेतात तुती व महोगणी पिकाचे विक्रमी उत्पादन घेत असल्याने या गावाची एक वेगळी ओळख होत चालली आहे. शेतकऱ्यांच्या समस्या सोडविण्यासाठी सरकार खंबीर आहे, अशी ग्वाही त्यांनी उपस्थित शेतकऱ्यांना दिली. याप्रसंगी आमदार विलास भुमरे यांनीही आपले मनोगत व्यक्त केले.

या वेळी रोजगार सेवक मदन बोंद्रे यांनी गावातील विकासकामांची माहिती दिली. सरपंच योगेश कोठुळे, उपसरपंच भास्कर गिते, कडेठाणचे सरपंच संभाजी तवार, सोपान थोरे, सरपंच रामनाथ डिघुळे, सरपंच विनोद राठोड, उपसरपंच श्रीमंत थोरे, माजी सरपंच अशोक भावले, नारायण पिवळ, पाटीलबा बोन्द्रे, मंडळ अधिकारी वैशाली कांबळे, सहायक गटविकास अधिकारी राजेश कांबळे, मदन बोन्द्रे, रमेश गोर्डे, दीपक जोशी, रेशीम रत्न सदाशिव गिते, रेशीम रत्न शहादेव ढाकणे, तालुका कृषी अधिकारी विकास पाटील, कृषी मंडळ अधिकारी अशोक पठाडे, अरुण कळमकर आदीं उपस्थित होते.