Eco Tourism : सातपुड्यात हिरवळ; पाल ‘इको टुरिझम’ला पसंती

Jalgaon News : पाल (ता. रावेर) मधील सातपुड्याच्या डोंगर रांगांमध्ये हिरवळ दाटली आहे. यात सुकी किंवा गारबर्डी मध्यम प्रकल्प (धरण) भरू लागला आहे. या भागात पर्यटक, अभ्यासक दाखल होत आहेत.

वन विभागाने पर्यटकांसाठी फायबर कुटी अन् वन्य प्राण्यांना न्यायाळण्यासाठी व पक्षी निरीक्षणासाठी उंच मनोरे उभारले आहेत. जिल्ह्यातील पाल इको टुरिझमला गती देण्यात आली. त्यास प्रतिसाद मिळत आहे.

पर्यटकांना आता जंगल सफारीसह निरीक्षणाचा मनमुराद आनंद मिळत आहे. यात दहा बाय दहाच्या फायबर कुटीत पंखा, लाइट, गॅलरी, खिडकी, सोलर प्लेट, रात्री मुक्कामाची व्यवस्था वन विभागाने केली आहे. या कुटीत तीन ते चार नागरिक राहू शकतात. वनक्षेत्रात पर्यटकांना वन्यप्राण्यांचा अभ्यास, त्यांचे महत्त्व, त्यांच्या हालचाली याची माहितीही मिळत आहे.

पाल अभयारण्य खानदेशात समृद्ध वनदर्शनासाठी प्रसिद्ध आहे. या भागात आदिवासी संस्कृतीची ओळख होते. काही शैक्षणिक संस्थाही या भागात आहेत. तेथे शेतीसंबंधी अभ्यास, पिके याबाबत शेतकरी अभ्यास दौरे करीत आहेत.

गारबर्डी धरणस्थळी प्रादेशिक वन विभागाने फायबर टेन्ट तयार केले आहेत. फायबर कुटीजवळच पर्यटक जेवण तयार करून या वनपर्यटनाचा मनमुराद आनंद घेऊ शकतात. ज्यांना पक्षी पाहायचे आहेत, त्यांच्यासाठी आणि ज्यांना वाघ पाहायचा आहेत, त्यांच्यासाठीही हे अभयारण्य एक आकर्षणाचे ठिकाण आहे. रानपिंगळ्याबरोबर गरुड, सुतार या पक्ष्यांसह दोनशेहून अधिक प्रजातींचे पक्षी या भागात आहेत.

पट्टेदार वाघासाठी प्रसिद्ध

पट्टेदार वाघासाठी हा भाग प्रसिद्ध आहे. बिबट्या, अस्वल, कोल्हा, लांडगा, रानकुत्रा, रानडुक्कर, रानमांजर, चिंकारा, हरिण, चितळ, चौशिंग्या, सांबर आणि नीलगायीही या भागात आहेत.

साग, अंजनासोबत ऐन, शिसव, तिवस, पिपळ, निंब, धावडा, खैर, हिरडा, बेहडा, तेदूंच्या झाडांची हिरवळ दाटली आहे. वनामध्ये बांबूही मोठ्या प्रमाणात दिसून येतो. पर्वतरांगांमध्ये विसावणारे ढग खुणावत असून, सातपुड्यावर धुक्याची दुलई पांघरली आहे की काय असे वाटू लागते. गारबर्डी धरण आकर्षणाचा बिंदू ठरत आहे.