Paddy Sowing : ‘शिराळा पश्चिमोत्तर’मध्ये भात पेरणीची लगबग

Shirala News : तालुक्यासह तालुक्याच्या पश्चिम भागात खरीप हंगामातील भात पिकाच्या पेरणीने शेतशिवारात चांगलाच जोर धरला आहे. जूनच्या पहिल्या पंधरावड्यापूर्वी भात पिकाची पेरणी पूर्ण होईल, असा अंदाज शेतकरी वर्तवत आहेत. शिराळा तालुक्याचा पश्चिम भाग विविध वाणाच्या भात पिकाचे माहेरघर म्हणून संबोधला जातो. तालुक्यात प्रत्येक वर्षी मे महिन्यात ‘धूळवाफ’ पद्धतीने भात पेरणीला सुरवात होते.

चालू वर्षी वळवाच्या पावसाचे आगमन उशरा झाल्याने ‘रोहिणीचा पेरा आणि मोत्याचा तुरा’ अशा बळीराजाच्या म्हणीवर रोहिणी नक्षत्राचा मुहूर्त शेतकऱ्यांना साधता आला नाही. सध्या शेतशिवारात विविध वाणांच्या भात पिकांची पेरणी करण्यासाठी बळीराजा, त्यांच्या कुटुंबीयांची चांगलीच धांदल उडालेली आहे.

भात पिकाच्या पेरणीसाठी शेतकरी पारंपरिक तसेच संकरित बियाणांच्या वाणांना विशेषतः प्राधान्यक्रम देताहेत. भात पिकांच्या जातीमध्ये कोमल, सोनम, जोंधळे, आरवन, इंद्रायणी, बासमती, सिल्की ७७७, नातपोहा, मेनका, सुप्रीम सोना, इंद्रायणी, मधुमती, वायएसआर, जोरदार, आमन, वडाकोलम, रत्नागिरी २४, ओम-३, रुची, पूनम, शतायू, सुमा, सिल्की २७७ कर्जत ३, ४, कोमल, ओमश्रीराम, भावना आदी सुधारित वाण आहेत. सर्वत्रच भात पेरणीला गती आल्याने परिसरातील कृषी केंद्रांवर बियाणे खरेदीसाठी शेतकऱ्यांची धांदल उडालीय.

भात पिकाच्या पेरणीने सारा शेतशिवारच माणसांनी बहरलाय. इंद्रायणी, कोमल, आरवन आदी भात पिकांच्या वाणांना शेतकरी बांधवांची अधिक मागणी असल्याची माहिती ‘सकाळ’शी बोलताना कृषी केंद्रचालक अजित शेणवी यांनी दिली.