Paddy Harvesting : खेडच्या पश्‍चिम भागात भात काढणीला वेग

Khed News : भाताचे आगार म्हणून ओळखले जाणाऱ्या खेड तालुक्याच्या पश्चिम पट्यात पावसाने उसंत घेतली आहे. यामुळे रखडलेल्या भात कापणीसह भात झोडणीच्या कामांना वेग आला आहे.

खेड तालुक्यात भात हेच खरिपातील मुख्य पीक आहे. सध्या ते परिपक्व झाले असून, कापणी सुरू झाली आहे. कापणीबरोबरच झोडणीची कामेही सुरू आहे. परंतु शेताच्या कामासाठी मजूरवर्ग मिळेनासा झाल्याने सावड पद्धतीने भाताची कापणी करण्यास शेतकरी प्राधान्य देत आहेत.

खेडच्या पश्चिम पट्यातील वाडा, वाळद, आव्हाट, खरोशी, डेहणे, धुवोली, शिरगांव, भिवेगांव, भोरगिरी यांसह अन्य भागात भात कापणीसह भात झोडणीच्या कामाला वेग आला आहे. त्यामुळे कामाला मजूर मिळवण्यासाठी भात शेती मालकांची लगबग मोठ्या प्रमाणात सुरू झाली आहे.

पाऊस दीर्घकाळपर्यंत राहिल्याने पाण्याची असलेली उपलब्धता व जमिनीत असलेल्या ओलीचा उपयोग करून घेण्यासाठी खरिपाची पिके काढून रब्बी हंगामाच्या पिकांसाठी शेतीचे क्षेत्र मोकळे करण्यास शेतकरी प्राधान्य देतो आहे.