Onion Banana Production : कांदेबाग, केळी उत्पादनाला मोठा फटका बसणार

Jalgaon News : खानदेशात कांदेबाग केळी पिकाची मोठी हानी विविध भागात उष्णता व वादळामुळे झाली आहे. जमिनीचे तापमान ५२ अंश सेल्सीअसपेक्षा अधिक राहीले. याचा परिणाम पिकवाढीवर झाला असून, बागांच्या निसवणीलाही फटका बसणार आहे. यामुळे पुढे उत्पादन कमी येईल, अशी स्थिती आहे.

कांदेबाग केळीची लागवड ऑक्टोबर ते नोव्हेंबर २०२३ मध्ये झाली होती. काहींनी डिसेंबरमध्येही उशिराची लागवड केली. या बागांची निसवण व काढणीची प्रक्रिया पावसाळ्यात सुरू होते. परंतु या बागांना यंदा उष्णतेचा मोठा फटका बसला आहे. अनेक भागांत कमाल तापमान ४७ अंश सेल्सिअसपर्यंत पोचले होते. जमिनीचे तापमानही ५२ अंश सेल्सिअसवर अनेक दिवस राहीले. एप्रिलमध्ये सुमारे १२ दिवस कमाल तापमान ४२ अंश सेल्सिअसवर राहीले.

या महिन्यात तापमानाने कहर केला. पुरेसे पाणी देवूनही कांदेबाग केळी होरपळली आहे. हलक्या, मध्यम जमिनीत बागांना उष्णतेचा मोठा फटका बसला आहे. केळी पीक ४० अंश सेल्सीअसपर्यंतच्या वातावरणात बऱ्यापैकी असते. यापेक्षा अधिक तापमान काही दिवस राहिल्यास पिकाच्या वाढीला फटका बसतो. पिकाची अन्नग्रहण क्षमता पूर्ण खालावते.

खानदेशात एप्रिल व मे महिन्यात केळी पिकासाठी प्रतिकूल वातावरण राहीले. पिकहानी वाढली आहे. यातच वादळी पाऊस, वेगाचा वारा यात केळीची पाने फाटली. यामुळे प्रकाश संश्लेषणाची क्रिया मंद झाली. पिकवाढ झालेली नाही. कांदेबाग केळीची निसवण जूनअखेरीस सुरू होते. परंतु यंदा निसवण काहीशी लांबणीवर पडू शकते. तसेच निसवलणीलाही फटका बसेल. कमी फण्या व दर्जा यावरही परिणाम होणार आहे.

कांदेबाग केळी पीक अनेक भागात सात ते आठ महिन्यांचे आहे. उशिराचे पीक सहा महिन्यांचे होत आले आहे. ऑक्टोबरमध्ये कांदेबाग केळीची काढणी वेग घेते. खानदेशात कांदेबाग केळीची सुमारे १२ हजार हेक्टरवर लागवड झाली आहे. सर्वाधिक लागवड चोपडा तालुक्यात आहे. त्यापाठोपाठ जामनेर, यावल, जळगाव, धुळ्यातील शिरपूर, नंदुरबारातील शहादा भागात कांदेबाग केळी पीक आहे.

रावेर, यावल, मुक्ताईनगर भागात कांदेबाग केळी पीक अल्प आहे. या सर्वच भागात केळी होरपळली आहे. या केळीला तापमानाचा दरवर्षी फटका बसत असल्याने उत्पादन किंवा रास २० किलोपर्यंत गाठणेही शक्य होत नाही. यंदाही अशीच स्थिती राहील. तसेच उत्पादन कमी राहणार असल्याने तुटवडादेखील राहू शकतो, अशीही माहिती आहे.