Monsoon Session 2024 : तिजोरीत खडखडाट थापांचा सुळसुळाट; अधिवेशनाच्या तिसऱ्या दिवशी विरोधकांची बजेटवरून खोचक टीका

Pune News : राज्याचे पावसाळी अधिवेशन सुरू झाले आहे. शनिवार (ता.२९) अधिवेशनाचा तिसऱ्या दिवशी विधानसभेचे कामकाज सुरू होण्याआधी विरोधकांनी विधानभवनाच्या पायऱ्यांवर घोषणाबाजी केली.  खिशात नाही आणा आणि बाजीराव म्हणा, ४० टक्के कमिशन घेणाऱ्या सरकारचा धिक्कार असो, अशा घोषणांनी विरोधकांनी विधानभवनाचा परिसर दणादणून सोडला. यावेळी विधानसभेतील विरोधी पक्षनेते विजय वडेट्टीवार, विधान परिषदेतील विरोधी पक्षनेते अंबादास दानवे, बाळासाहेब थोरात, भाई जगताप, सतेज पाटील, रविंद्र धंगेकर, शरदचंद्र पवार राष्ट्रवादी काँग्रेस पक्षाचे आमदार जितेंद्र आव्हाड यांच्यासह महाविकास आघाडीतील आमदार उपस्थित होते.       

यादरम्यान अजित पवार यांनी शुक्रवारी अंतरिम अर्थसंकल्प सादर केला होता. त्यावरून देखील विरोधकांनी सरकरावर जोरदार टीका केली होती. यानंतर आता अर्थसंकल्पावर विधानसभेत चर्चा होण्याची शक्यता आहे. मात्र कामकाज सुरू होण्याच्या आधीच विरोधक चांगेलच आक्रमक झालेले पाहायला मिळाले.

यावेळी विरोधकांनी महायुती सरकारचा शेवटचा अर्थसंकल्प म्हणत मविआच्या आमदारांनी महायुतीच्या अर्थसंकल्पाची पोलखोल करत खोचक टीका केली आहे. तर लोकसभा निवडणुकीचा धसका, विधानसभेला मस्का, भाऊ म्हणून दाखवलं महिलांना योजनांचे भुल, महिलाच करतील निवडणुकीत गूल, निधीची वानवा आणि खैरातीचा गारवा अशा देखील घोषणा विरोधकांनी यावेळी दिल्या. तर बजेटमध्ये मोठ्या घोषणांचा पाऊस महायुतीने पाडला. तर या घोषणा फक्त विधानसभा निवडणुकींच्यासाठी आटापीटा असल्याचे मविआच्या नेत्यांनी म्हटले आहे.  

दरम्यान, यावेळी शरदचंद्र पवार राष्ट्रवादी काँग्रेस पक्षाचे आमदार जितेंद्र आव्हाड यांनी हातात विठ्ठल-रूक्मिणीची मुर्ती घेऊन सरकराचा निषेध व्यक्त केला. तर शिंदे गटाच्या आमदारांनीही उद्धव ठाकरेंविरोधात घोषणाबाजी केल्याने ठाकरे गट-शिंदे गट आमने-सामने आले होते.