Shaktipeeth Highway : ‘शक्तिपीठ’बाबत साडेतीनशे शेतकऱ्यांचे आक्षेप

Latur News : नागपूर ते गोवा हा शक्तिपीठ राष्ट्रीय महामार्ग होणार आहे. याबाबत शासनाने राजपत्रही प्रसिद्ध केले आहे. याकरिता आता शेत जमिनीचे संपादन केले जाणार आहे. पण याला शेतकऱ्यांचा विरोध होऊ लागला आहे. लातूर, रेणापूर, औसा या तीन तालुक्यातून हा राष्ट्रीय महामार्ग जाणार आहे. या तीन तालुक्यातील १९ गावांतून ३५५ शेतकऱ्यांनी आक्षेप नोंदविला आहे.

शक्तिपीठ हा राष्ट्रीय महामार्ग केंद्रीयमंत्री नितीन गडकरी यांचा महत्वकांक्षी प्रकल्प आहे. काही दिवसापूर्वी अहमदपूर येथे विविध राष्ट्रीय महामार्गाचे लोकार्पण गडकरी यांच्या हस्ते झाले होते. त्याच वेळी त्यांनी शक्तिपीठ महामार्ग येथून जाणार असल्याची घोषणा केली होती. त्यानंतर काही दिवसातच या महामार्गाचे राजपत्र शासनाने प्रसिद्ध केले होते. यात ता. २८ मार्चपर्यंत शेतकऱ्यांना संबंधित उपविभागीय अधिकाऱ्यांकडे आक्षेप दाखल करण्यासाठी आवाहन करण्यात आले होते.

हा महामार्ग अंबाजोगाई येथून लातूर जिल्ह्यात येणार आहे. यात रेणापूर तालुक्यातील चार, लातूर तालुक्यातील अकरा व औसा तालुक्यातील आठ गावातून हा महामार्ग जाणार आहे. या गावातील शेतकऱ्यांच्या जमिनी संपादित केल्या जाणार आहेत. या एकूण १९ गावातील ३५५ शेतकऱ्यांनी आक्षेप घेतले आहेत. यावर सुनावणी होणार आहे.

या बहुतांश शेतकऱ्यांच्या जमिनी हा बागायती आहेत. अनेकांचा उदरनिर्वाहाचे साधन शेती आहे. रस्त्यासाठी शेती गेली तर अल्पभूधारक किंवा भूमिहीन व्हावे लागणार आहे. आधीच शेती कमी झाली आहे. त्यातही शेती गेली तर हातात काहीच राहणार नाही याची भीतीही शेतकऱ्यांना आहे. शेती गेली तर आर्थिक स्थितीच ढासळणार आहे. त्यामुळे या महामार्गाला विरोध होत आहे. सुनावणीची प्रक्रिया लोकसभा निवडणुकीनंतरच होणार आहे. त्यात काय होते याकडे शेतकऱ्यांचे लक्ष असणार आहे.

या गावांतून होतोय विरोध

शक्तिपीठ महामार्ग हा लातूर तालुक्यातील गांजूर, रामेश्वर, दिंडेगाव, कासारजवळगा, काटगाव, मांजरी, चिंचोली बल्लाळनाथ, गातेगाव, मुरुड-अकोला, चाटा, बोपला या मांजरा नदीच्या पट्ट्यातून जात आहे. तसेच रेणापूर तालुक्यातील डिघोळ देशमुख, भोकरंबा, चाडगाव व मोरवड या ऊस लागवड असलेल्या भागामधून हा महामार्ग जात आहे. तसेच औसा तालुक्यातील कवठा केज, नावोली, भेटा व अंधोरा या गावातून हा महामार्ग जात असून या गावातील शेतकऱ्यांचा त्याला विरोध आहे.