Cotton Productivity : कापूस उत्पादकता वाढीसाठी ‘न्यूट्रियंट एक्‍स्पर्ट’ विकसित

Nagpur News : कापूस उत्पादक शेतकऱ्यांना योग्य अन्नद्रव्य व्यवस्थापनातून अपेक्षित उत्पादकता मिळावी याकरिता केंद्रीय कापूस संशोधन संस्थेने ‘न्यूट्रियंट एक्‍स्पर्ट’ हे ‘सॉफ्टवेअर’ विकसित केले आहे. त्याचा शेतकऱ्यांनी लाभ घ्यावा, असे आवाहन संस्थेचे तज्ज्ञ डॉ. ए मणिकंदन यांनी केले.

अमरावती, नागपूर आणि वर्धा येथे ‘न्यूट्रियंट एक्‍स्पर्ट’ (पोषक अन्नद्रव्ये तज्ज्ञ) या ‘सॉफ्टवेअर’ विषयी माहिती व्हावी या उद्देशाने प्रशिक्षणाचे आयोजन करण्यात आले होते. या वेळी ते बोलत होते. स्वप्नील शेळके (चिस्तूर, आष्टी, वर्धा) यांच्या शेतावर आयोजित प्रशिक्षणाला १२५ शेतकऱ्यांची उपस्थिती होती.

आखतवाडा (तिवसा, अमरावती), बेलोरा (अमरावती), काटोल (नागपूर) येथे देखील हे प्रशिक्षण पार पडले. त्यालाही शेतकऱ्यांचा उत्स्फूर्त प्रतिसाद होता. डॉ. मणिकंदन म्हणाले, की अधिक पीक उत्पादकतेसाठी काही शेतकऱ्यांकडून काही वेळा खतांचा अमर्याद वा अतिरेकी वापर केला जातो. त्यातून उत्पादकता वाढ काही प्रमाणात होत असली तरी खर्चही वाढतो०. त्यामुळे अन्नद्रव्य व्यवस्थापन योग्य होण्यासाठी शेतकऱ्यांनी तांत्रिक बाबींवर भर दिला पाहिजे.

‘न्यूट्रियंट एक्‍स्पर्ट’च्या माध्यमातून अपेक्षित उत्पादकता आणि अन्नद्रव्य व्यवस्थापनाविषयी माहिती कळते. हा पर्याय देखील काहीसा खर्चिक ठरतो. परंतु उत्पादकता मात्र वाढण्यास मदत होते. हे महत्त्व लक्षात घेऊन शेतकऱ्यांनी कापूस उत्पादकता वाढीसाठी तांत्रिक बाबींवर भर द्यावा.

डॉ. माणिक शृंगारे, ‘सिटी सीडीआरए’ चे आशिष बिसेन, डॉ. समीर वायडालकर, अमित कोहळे यांनीही यावेळी शेतकऱ्यांना मार्गदर्शन केले. केंद्रीय कापूस संशोधन संस्थेचे संचालक डॉ. वाय. जी. प्रसाद यांच्या मार्गदर्शनात हे प्रशिक्षण आयोजित करण्यात आले होते.