Eknath Shinde : 'शक्तिपीठ'ला जिथे विरोध तिथे काम केले जाणार नाही; एकनाथ शिंदेंचे वक्तव्य

Eknath shinde Shaktipeeth Highway : महामार्ग हे विकासाचे ‘गेमचेंजर ‘म्हणून सिद्ध होतात. समृद्धी महामार्गाच्या माध्यामातून हे सिद्ध झाले आहे. सुरुवातीला समृद्धी महामार्गाला विरोध होता. समृद्धी सारखाच शक्तीपीठ महामार्गाचा विरोध देखील हळूहळू मावळेल. असे वक्तव्य उपमुख्यमंत्री एकनाथ शिंदे यांनी केले आहे. गुरूवारी(ता.०६) नांदेड येथे पत्रकारांशी संवाद साधला.

उपमुख्यमंत्री शिंदे म्हणाले की, "शक्तिपीठ महामार्गाचा विरोध ओसरेल. समृद्धी किंवा शक्तिपीठ सारखे महामार्ग केवळ दळणवळणाची व्यवस्था नाही तर या भागातील कृषीवर आधारित अर्थव्यवस्थेला गती देणारे नवीन मॉडेल आहे. शक्तिपीठ महामार्गाचे महत्व कळल्यावर. भविष्यातील दळणवळणाचे व विकासाचे महत्त्व पटल्यानंतर, विरोध मावळतो. शक्तिपीठ महामार्ग कुठेही जनतेवर लादणार नाही, असे सांगताना जिथे विरोध आहे तिथे काम केले जाणार नाही. त्याठिकाणी रस्त्याची अलाइनमेंट बदलली जाईल. त्याचवेळी त्या-त्या भागाची कनेक्टिव्हिटीही महत्त्वाची आहे." असे ही शिंदे यांनी सांगितले.

"समृद्धी महामार्गाला प्रारंभी विरोध होता; मात्र त्याची उपयुक्तता सिद्ध होताच विरोध मावळला आहे. अशीच परिस्थिती शक्तिपीठ महामार्गाची असल्याचे शिंदे यांनी सांगितले. सर्वांनी या मोठ्या प्रकल्पासाठी सहकार्य करण्याचे आवाहन त्यांनी केले".

कोणत्याच योजना बंद होणार नाही

"राज्य शासनाची महत्त्वाकांक्षी मुख्यमंत्री लाडकी बहीण योजना असो वा राज्य सरकारने सुरू केलेल्या कोणत्याही योजना बंद केल्या जाणार नाहीत, तसेच यापूर्वीच्या कोणत्याही चांगल्या योजना बंद होणार नाहीत, अशी स्पष्ट ग्वाही त्यांनी दिली. उलट मराठवाड्याची दुष्काळवाडा अशी असलेली ओळख दूर करण्यासाठी बंद पडलेल्या योजना महायुती सरकार पुन्हा सुरू करीत आहे". उपमुख्यमंत्री एकनाथ शिंदे यांनी दिली.

बंद पडलेल्या मराठवाडा वॉटर ग्रीड, जलयुक्त शिवार योजना, पुन्हा सुरू करून मराठवाड्यातील पाण्याचा प्रश्न दूर करण्यात येईल. मराठवाड्यासाठी ११ जलसिंचन योजनांना मंजुरी दिल्याचेही शिंदे यांनी सांगितले.