Agriculture Solar Pump : शेतकऱ्यांना सौरपंपांची सक्ती नको, ‘महावितरण’कडून थेट वीज द्या ; खासदार मानेंचे कृषिमंत्र्यांना निवेदन

Kolhapur News : शेतकऱ्यांना सौरपंपांची सक्ती न करता ‘महावितरण’कडूनच वीजपुरवठा व्हावा, या मागणीचे निवेदन खासदार धैर्यशील माने यांनी कृषिमंत्री माणिकराव कोकाटे यांना दिले. निवेदनात म्हटले आहे की, महावितरण कंपनीद्वारे सद्यःस्थितीत शेतकऱ्यांना वीजपुरवठा करण्याकरिता फक्त सौरपंपाची सक्ती केली जात आहे.

त्यामुळे अनेक शेतकऱ्यांना वीज पुरवठ्यापासून वंचित राहावे लागत आहे. बरेच शेतकरी यांनी स्वतः खर्च करून वीज यंत्रणा उभी केली आहे. तसेच काही ठिकाणी जिल्हा नियोजनाच्या माध्यमातून अतिरिक्त ट्रान्सफॉर्मर उभे करून वीज पुरवठ्याची सुविधा झाली आहे.

परंतु या ठिकाणी ही महावितरणद्वारे सौरपंपाची सक्ती केली जात आहे. अनेक शेतकऱ्यांची शेती नदीकाठावर आहे. त्या ठिकाणी पूर बाधित क्षेत्र असल्यामुळे सौर पॅनेल बसवता येत नाहीत.

डोंगरी तालुक्यामध्ये व वनक्षेत्र जास्त असलेल्या भागांमध्ये सूर्यकिरणांची तीव्रता कमी असल्यामुळे अशा ठिकाणी सौरपंपा‌द्वारे पाणीपुरवठा होऊ शकत नाही. तरी सर्व बाबींचा विचार करता महावितरण कंपनीद्वारे शेतकऱ्यांना ज्यांची मंजुरी जुनी आहे किंवा वीज यंत्रणा उभी करण्यात आली आहे, अशा ठिकाणी तत्काळ वीज जोडणी देण्याबाबत सूचना देण्यात याव्यात.

तसेच ज्या ठिकाणी सौरपंपा‌द्वारे पाणीपुरवठा केला जाऊ शकत नाही, अशा ठिकाणी महावितरण यंत्रणे‌द्वारे वीजपुरवठा देण्याबाबत संबंधित महावितरणच्या वरिष्ठ कार्यालयाला सूचना द्याव्यात.