Colleges of Agriculture : भोकरदन आणि बार्शीत नवीन कृषी महाविद्यालये

Mumbai News : राज्यातील दोन शैक्षणिक संस्थांना कायमस्वरूपी विनाअनुदान तत्त्वावर कृषी महाविद्यालये सुरू करण्यास राज्य सरकारने मान्यता दिली आहे. भोकरदन आणि बार्शी येथे ही महाविद्यालये सुरू होणार आहेत. तर बारामती येथील कृषी व्यवसाय व्यवस्थापन महाविद्यालयाच्या वाढीव तुकडीस मान्यता देण्यात आली आहे.

ही महाविद्यालये यंदाच्या शैक्षणिक वर्षापासून सुरू होणार असून पदवी प्रवेशासाठी राज्य सामाईक परीक्षा कक्ष, प्रवेश नियामक प्राधिकरणाने मान्य केलेल्या नियमानुसार राबविण्यात येणार आहे.

वसंतराव नाईक मराठवाडा कृषी विद्यापीठ, परभणीअंतर्गत भोकरदन येथील शिवाजी महाराज स्मारक समितीच्या शिवाजी महाराज कृषी महाविद्यालय, विझोरा, महात्मा फुले कृषी विद्यापीठ राहुरी अंतर्गत आणि बार्शी येथील शिवाजी शिक्षण प्रसारक मंडळाच्या कर्मवीर डॉ. मामासाहेब जगदाळे कृषी महाविद्यालयाला मान्यता देण्यात आली आहे.

ॲग्रिकल्चर डेव्हलपमेंट ट्रस्ट बारामती, पुणे संस्थेच्या कृषी व्यवसाय व्यवस्थापन महाविद्यालय, शारदानगर या महाविद्यालयास प्रतिवर्ष ६० प्रवेशक्षमतेच्या तुकडीवाढीस मान्यता दिली आहे. यामध्ये १२० विद्यार्थी प्रतिवर्ष अशी महाविद्यालयाची प्रवेशक्षमता आहे.

यंदाच्या शैक्षणिक वर्षापासून ही मान्यता देण्यात आली आहे. नव्याने मान्यता देण्यात आलेल्या दोन महाविद्यालयांची प्रवेश क्षमता प्रविवर्ष ६० विद्यार्थी आहे. ही महाविद्यालये कायमस्वरूपी खासगी तत्त्वावर आहेत.