Orange Crop Management : नैसर्गिक पद्धतीने हळद, संत्रा पीक नियोजन कार्यशाळा

Washim News : या वर्षी प्रायोगिक तत्त्वावर नैसर्गिक पद्धतीने गोकृपा अमृत आधारित हळद व संत्रा पिकाचे प्रात्यक्षिक निवडक शेतकऱ्यांच्या शेतावर घेण्यात आले होते. या दोन्ही पिकाच्या उत्पादनात अपेक्षित वाढ दिसून आली व उत्पादन खर्च कमी होऊन जमिनीची व उत्पादित मालाची प्रतसुद्धा वाढलेली दिसून आली. या अनुषंगाने कृषी विज्ञान केंद्रातंर्गत उद्यानविद्या विभागाच्या वतीने हळद व संत्रा पीक नियोजन कार्यशाळा घेण्यात आली.

हळद, संत्रा पिकांमध्ये येत्या खरीप हंगामात नियोजन बद्ध अंमलबजावणी करण्याच्या दृष्टीने उद्यानविद्या तज्ञ निवृत्ती पाटील यांच्या पुढाकाराने नुकतेच अहमदाबाद येथे दोन दिवसीय प्रशिक्षण व अभ्यासदौरा झाला. याचाच पुढील भाग म्हणून केव्हीकेच्या प्रक्षेत्रावर गोकृपा अमृत आधारित नैसर्गिक पद्धतीने हळद व संत्रा पीक नियोजन या विषयावर कार्यशाळा झाली.

कार्यशाळेच्या अध्यक्षस्थानी कृषी विज्ञान केंद्राचे प्रमुख डॉ. आर. एल. काळे होते. प्रमुख मार्गदर्शक म्हणून निवृत्ती पाटील होते. कार्यशाळेस रिसोड, मालेगाव व मानोरा तालुक्यांतील बहुसंख्य हळद व संत्रा उत्पादक सहभागी झाले.

तांत्रिक सत्रात पाटील यांनी हळद व संत्रा पिकाचे सेंद्रिय पद्धतीने अन्नद्रव्य व्यवस्थापन, प्रमुख किड व रोगांची ओळख, प्रादुर्भाव होण्याचा मुख्य कालावधी व त्यांचे जैविक नियंत्रण आदी विषयांवर सविस्तर माहिती दिली. आगामी खरीप हंगामात गोकृपा अमृतने कंपोस्ट खत निर्मिती व गोकृपा अमृत बनविण्याच्या पद्धतीबद्दल सविस्तरपणे मार्गदर्शन केले.

विलासराव बोरकर (वडजी), गणेश गव्हाणे (कोयाळी), गोविंद देशमुख (करडा) या शेतकऱ्यांनी मागील हंगामात हळद व संत्रा पिकात या पद्धतीचा अवलंब केला असून आपले अनुभव मांडले. डॉ. काळे यांनी नैसर्गिक शेती ही काळाची गरज असून जमिनीचे आरोग्य राखून निरोगी आणि किड व रोगस प्रतिकारक्षम पीक उत्पादित करण्याचे आवाहन केले.

तांत्रिक सत्रानंतर करडा येथील गोविंद देशमुख यांच्या शेतात सेंद्रिय हळद व इतर पिकांची तसेच कंपोस्ट खत निर्मिती व गोकृपा अमृत कल्चर निर्मितीयुनिटची शेतकऱ्यांनी पाहणी केली.