Shrikant Shinde : 'मुख्यमंत्री शिंदे दोन दिवस गावी असताना अफवांना पेव फुटला'; मंत्रिपदाच्या शर्यतीवरून श्रीकांत शिंदेंनी अखेर मौन सोडले

Pune News : महायुतीच्या नव्या सरकारमध्ये गृहमंत्री पदासह उपमुख्यमंत्री पद मिळाले म्हणून काळजीवाहू मुख्यमंत्री एकनाथ शिंदे आग्रही असल्याच्या चर्चा आहेत. तर एकनाथ शिंदे केंद्रात मंत्रिपदी आणि उपमुख्यपदावर खासदार श्रीकांत शिंदे यांची वर्णी लागेल असेही बोलले जात होते. यावरून श्रीकांत शिंदे यांनी समाजमाध्यम एक्सवरून, आपल्याला आधीच केंद्रात संधी होती. मात्र ती आपण घेतली नाही. तर आताही उपमुख्यमंत्रीपद असो किंवा मंत्रिपदाची शर्यत यात आपण नसल्याचे म्हटले आहे. यामुळे नव्या सरकारमध्ये एकनाथ शिंदे यांच्यासह त्यांचे चिरंजीव श्रीकांत शिंदे देखील नसणार, अशा चर्चा सुरू झाल्या आहेत.

विधानसभा निवडणुकीचा निकाल लागून आता ९ दिवस झाले आहेत. अद्याप मुख्यमंत्री कोण यावर महायुतीत निर्णय झालेला नाही. देवेंद्र फडणवीस यांचे नाव निश्चित मानले जात असून अधिकृत घोषणा अद्याप झालेली नाही. तर नव्या सरकारचा शपथविधी गुरूवारी (ता.५) होणार असून काळजीवाहू मुख्यमंत्री एकनाथ शिंदे यांच्या मागणीमुळे अडचणी निर्माण झाल्या आहेत.

दिल्लीतल्या बैठकीनंतर एकनाथ शिंदे त्यांच्या मूळगावी दरे येथे गेले. तेथेच त्यांची तब्बेल बिघडल्याने ते दोन दिवस राहिले. यानंतर रविवारी ते ठाण्यात परतले. आता सोमवारी देखील त्यांची तब्बेत बिघडल्याने बैठका आणि सर्व कार्यक्रम रद्द रद्द करण्यात आले आहेत.

दरम्यान श्रीकांत शिंदे यांनी उपमुख्यमंत्री पदावरून आपली भूमीका स्पष्ट करणारी पोष्ट केली आहे. ज्यात त्यांनी उपमुख्यमंत्री म्हणून आपल्या नावाची चर्चा सुरू असून या फक्त अफवा आहेत. यात काहीही नाही. लोकसभा निवडणुकीनंतरच केंद्रात मंत्रिपदाची संधी होती. मात्र पक्षसंघटनेचा विचार करून आपण ती संधी सोडल्याचे श्रीकांत शिंदे यांनी म्हटले आहे.

तर महायुती सरकारचा शपथविधी थोडा लांबला. आता त्यावरून चर्चा आणि अफवा पसरवल्या जात आहेत. गेल्या दोन दिवसापासून अफवांचे पीक फोफावले. काळजीवाहू मुख्यमंत्री एकनाथ शिंदे यांची प्रकृती अस्वास्थ्यामुळे याला अधिकच बहर आला.

तर माझे नाव घेऊन उपमुख्यमंत्री मीच होणार अशा बातम्या पेरल्या गेल्या. पण वस्तूतः यात कोणतेही तथ्य नाही. उपमुख्यमंत्री पदाबाबतच्या अशा सर्व बातम्या निराधार आणि बिनबुडाच्या आहेत. मंत्रिपदाची कुठलीही लालसा नसून आपण कोणत्याही मंत्रिपदाच्या शर्यतीत नाही, असेही श्रीकांत शिंदे यांनी स्पष्ट केले आहे.